Búgin S tobyndaǵy komandalar toptyq kezeńdegi básekelerin aıaqtady, dep habarlaıdy Egemen.kz.
Úshinshi týrda Ýkraına Aýstrııamen kelesi kezeńniń joldamasyn sarapqa salsa, Nıderland Soltústik Makedonııadan emtıhan qabyldady.
«Iohan Kroıff Arenada» (Amsterdam) ótken kezdesýde Nıderland quramasy Eýropa chempıonatyna tuńǵysh ret qatysyp jatqan Soltústik Makedonııa qaqpasyna jaýapsyz úsh gol soqty. Birinshi taımda Memfıs Depaı quramasyn esepte alǵa shyǵarsa, ekinshi taımda Djordjıno Veınaldým eki gol soǵyp, dýbl avtory atandy. Veınaldýmdyń eki golyna da Depaı assıstenttik jasady. Qorytyndy esep – 3:0. Endi Nıderland quramasy pleı-off kezeńinde A tobynda ekinshi oryn alǵan Ýels fýtbolshylarymen kezdesedi. Úsh oıynda birde-bir upaı ala almaǵan Soltústik Makedonııa úshin osymen Eýropa chempıonaty aıaqtaldy.
Al qatar ótken ekinshi matchta Aýstrııa fýtbolshylary Ýkraınadan basym tústi – 1:0. Oıyndaǵy jalǵyz ári jeńisti goldy birinshi taımnyń 21-mınýtynda Krıstof Baýmgartner saldy. Nátıjeli pastyń avtory – Davıd Alaba. Osylaısha Aýstrııa quramasy óz tarıhynda alǵash ret Eýropa chempıonatynyń 1/8 kezeńine joldama aldy. Al Andreı Shevchenko shákirtteri tarazy basyn teńestirýge qansha umtylǵanymen, Aýstrııa fýtbolshylary qarsylastaryna gol soǵatyn múmkindik bergen joq. О́ıtkeni teń nátıje Ýkraına quramasyn kelesi kezeńge alyp shyǵatyn edi.
Endi Aýstrııa pleı-off básekesinde A tobynda birinshi oryn alǵan Italııa quramasymen baq synasady.