О́ńir «qyzyl aımaqtyń» qursaýynda turǵan kezde aýdan turǵyndary bir-birine qol ushyn sozyp, qamqor bola bildi. El bolǵan soń kómekti qajet etetinderdiń de kezdesip jatýy ábden múmkin. Bir jaqsysy, olardyń eshqaısysy qıyndyqpen jalǵyz alysqan joq. Ejelden birligi bekem óńirde jan shýaǵynyń jylýy sezilip turdy. Ásirese, jas tolqynnyń janashyrlyǵy egde adamdardyń súıispenshiligin týdyrdy.
Aǵa býyn zamanynyń osy bir qıyn kezinde el ıyǵyna túsken aýyrtpalyqty kátepti qara nardaı birge kóterisken jastarǵa, mektep oqýshylaryna dán razy bolyp, aq batalaryn berdi. Tálimdi tárbıe alyp, jas quraqtaı jetilip kele jatqan jastar bolsa, maqtaý-marapattaý úshin emes, ózderiniń júrek qalaýymen qaýip-qaterge qaramaı, izgilikpen ádiptelgen izetti is-qımyldaryn óristete berdi.
Árbir kókirekte qıyn ýaqytta qysylǵan adamdarǵa qamqor bolsam eken degen izgi nıet eriktiler jylynyń aıasynda keńinen óristedi. Aýdan ortalyǵyndaǵy №1 orta mekteptiń eriktileri men jastar resýrstyq ortalyǵy «Biz birgemiz» aksııasy aıasynda kóp eńbek etti.
Jan shýaǵyn sebezgileıtin, estigen jannyń et júregin eljiretetin nátıjeli is-qımyl jas tolqynnyń tarapynan jasalýy tipti qýanyshty. Aýdandaǵy Makınka, Bulandy Donskoı, Maqpal orta mektepteriniń oqýshylary respýblıkalyq «Qazaqstan – meıirimdilik mekeni» aksııasyn birden qoldap áketti. Eń aldymen muqııat tizim jasaldy. Erikti jastar qoldaý-kómekti qajet etetin adamdardyń nazardan tys qalyp qoımaýyna aıryqsha mán berdi. Jaqsylyq jasaýǵa toptasqan jas qaýym tizim boıynsha mekenjaılarǵa baryp, olardyń ótinishterin tyńdap, qoldan keler kómekten aıanyp qalǵan joq. Bul óńirde qar qalyń túsedi. Jalǵyzilikti jandardy qysta qınaıtyn jaı da osy. О́tken qysta top-top bolyp aýla arshyǵan jas tolqyn júzdegen tekshe metr qardy eldi mekenniń syrtyna shyǵaryp berdi.
Dert dúmep turǵan kezde aldyn alý maqsatynda jadynamalar úlestirip, oblystyń bas sanıtarlyq dárigeriniń karantın kezindegi shekteý men tolyqtyrýlar týraly qaýlysyn taratyp, jalpaq jurtty qulaqtandyrdy. Sozylmaly syrqaty bar, qarǵa adym jer muń bolyp otyrǵan qarııalarǵa emhanadan tegin dári-dármekterdi aparyp berip, alǵystaryn arqalady.
Jaqsylyq jasaýdan aǵa býyn da shet qalǵan joq. Máselen, «Semizbaı-U» seriktestigi provızorlyq stasıonarǵa 2 ottegi kondensatoryn, 10 pýlsoksımetr, ondaǵan dana kombınezon, medısınalyq halat, tósektik oryn jabdyqtaryn satyp alyp berdi. Jınaqtaı aıtqanda, osy zattar úshin seriktestik 2,5 mln teńge qarajatyn jumsady. Al el jaıy dese eleńdep turatyn eriktiler óz qoldarymen ádemilep, berik etip betperdeler tigip, turǵyndarǵa tegin taratty. Kóp balaly jáne az qamtylǵan otbasylaryna, eńbek ardagerlerine qarjylaı kómek kórsetti, azyq-túlik sebetterin taratty.
Oblystyq «Jas Otan» jastar qanatynyń tóraǵasy Sultanbek Bekeshev, «Fenıks» eriktiler ortalyǵynyń jetekshisi Sultan Joldybaev jastarmen semınar keńester ótkizdi. Jıyn barysynda el birligin nyǵaıta túsetin jaqsylyq sharapattyń ıgi áseri týraly áserli áńgimeler aıtyldy.
Birjan sal elindegi berekeli sharýa eń aldymen tutastyqty, adamgershiliktiń dáni sebilgen aımaqta jaqsylyqtyń jalaýy bıiktep turatynyn kórsetip berdi. Janashyrlyq isimen ózgege úlgi-ónege bolǵan jastardyń sharýasy atap aıtýǵa turarlyq.
Aqmola oblysy,
Birjan sal aýdany