Byltyr koronavırýs jańa bastalǵan tusta bar salmaq dárigerlerge túsip, olar deregi belgisiz dertpen kúreste myńdaǵan jandy ajaldan arashalap qaldy. Epıdahýal órshigen kezde aılap úı betin kórmeı eńbek etken medısına mamandarynyń arasynda osy indet tyrnaǵyna ilinip, kóz jumǵandar da bar.
Olar aqyryna deıin ózderiniń antyna adal boldy. Qyzylorda qalasynda medısına mamandarynyń kásibı merekesi kúni ózgeniń saýlyǵyn qorǵaı júrip, óz ómirin qıǵandardyń erligin eske salyp turatyn eskertkish ashyldy.
Qyzylorda joǵary medısınalyq kolledji aýlasynan oryn tepken eskertkish belginiń ashylý saltanatyna oblys ákiminiń orynbasary Baljan Shámenova, sala ardagerleri qatysty. Oblys ákiminiń orynbasary medısına qyzmetkerleriniń el densaýlyǵyn saqtaý jolynda atqarǵan qyzmetine laıyqty baǵa berip, olardyń tynymsyz eńbeginiń nátıjesinde búginde óńirde aýrý deńgeıi tómendegenin atap ótti. Sala ardagerleri Turǵanbaı Mahanov, Raısa Kózdenova dertpen alysqan áriptesteriniń eńbegine tabys tiledi.
– Men el saýlyǵy jolynda ómirin qıǵan áriptesterimizdi búgingi zamannyń batyrlaryna teńer edim. Olardyń erligin umytpaýǵa, el bolyp ulyqtaýǵa arnalǵan eskertkish úshin medısına qyzmetkerleri atynan alǵys bildiremin, – dedi T.Mahanov.
Indetpen kúreste jan qıǵan dárigerlerge eskertkish ornatý ıdeıasynyń avtory – Q-Med medısınalyq ortalyqtarynyń dırektory Raýshan Bazarbaı. Ol ózgege jaryq syılap, ózderi mert bolǵan áriptesteriniń erligin eske salatyn músindi daıyndaýǵa, ornatýǵa óz qarajatyn jumsady. Al dızaınyn jasaǵan – belgili sýretshi Álibek Qoılaqaev. Onyń qııalynan týǵan dúnıe Qyzylorda qalasyndaǵy «Nadyr» kompanııasynda músinge aınaldy.
Qorǵanysh kostıýminde Jer sharyn qushaqtap otyrǵan dáriger beınesiniń bolashaq mamandar daıyndaıtyn oqý orny aýlasyna qoıylýynda mán bar.
– Men dárigerlerdiń indet órship turǵan kezdegi janqııarlyq eńbegine talaı márte kýá boldym. Sondyqtan da myńdaǵan jandy indet tyrnaǵynan arashalap, ózderi qurban bolǵandarǵa qurmet kórsetý byltyrdan beri oıda júrgen is edi Sonyń sáti búgin túsip jatyr. Osy kolledjde bilim alyp jatqan bolashaq mamandarǵa antyna adal bolǵan aǵa býyn áriptesteriniń erligi úlgi bolady degen oıdamyn, – deıdi R.Bazarbaı.
Syr óńirinde koronavırýspen kúreske jumylǵan mamandar arasynan 19 medısına qyzmetkeri qaıtys boldy. Sharaǵa olardyń týystary qatysyp, eskertkishke gúl shoqtaryn qoıdy.
QYZYLORDA