Densaýlyq saqtaý mınıstrliginiń 21 maýsymdaǵy el óńirlerindegi epıdemııalyq ahýaldy baǵalaý matrısasy boıynsha Shymkent qalasy «sary aımaqqa» ótti. Oǵan, ókinishke qaraı, indetke shaldyqqandar sanynyń arta túsýi sebep bolyp otyr.
Shymkentte 20 maýsymda koronavırýstyń 59 jaǵdaıy tirkeldi. Infeksııalyq stasıonarǵa 13 adam jatqyzylyp, 46 adam úı baqylaýyna alyndy. Qazirgi tańda mamandandyrylǵan ınfeksııalyq stasıonarlarda barlyǵy 1 276 oryn bar, ıaǵnı tósektik oryn tolymdyǵy – 26%. Infeksııalyq stasıonarda 338 naýqas emdelýde. Onyń 171-i koronavırýstan, 167-si pnevmonııadan emdelýde, al 12 naýqas jansaqtaý bóliminde jatyr. Sońǵy táýlikte – 1 094, jalpy osy kúnge deıin 462 487 adamnan PTR synamasy alynǵan. Sondaı-aq úshinshi megapolıste bir táýlik ishinde 2 354 adam vaksına aldy. Egý naýqany bastalǵaly barlyǵy 228 356 adam ekpe saldyrdy. Onyń ishinde 132 259 adam vaksınanyń eki komponentin alǵan.
Qala aýmaǵynda sanıtarlyq-epıdemııalyq talaptardyń saqtalýyna monıtorıng júrgizetin 20 mobıldi top jumys isteıdi. Olar 20 maýsym kúni 212 nysanǵa tekserý jumystaryn júrgizgen. Onyń ishinde 8 nysanda karantın rejiminiń talaptary buzylǵany anyqtalyp, ákimshilik hattama toltyryldy. Karantın rejiminiń talaptaryn saqtaý jóninde kún saıyn eskertilip jatqanymen toı-jıyndar tyıylmaı tur. Mysaly, Eńbekshi aýdany polısııa basqarmasynyń qyzmetkerleri karantın talaptarynyń saqtalýyn baqylaý maqsatynda júrgizgen reıdtik is-shara kezinde úlken toıdyń ústinen tústi. Iаǵnı jeksenbiniń keshinde aýdan aýmaǵynda ornalasqan Hayat toıhanasy karantındik shekteýlerdi buzyp, úılený toıyn ótkizip jatqanyn anyqtady. Bas sanıtarlyq dárigerdiń qaýlysyna baǵynbastan, uıymdastyrýshy toıǵa 250 adamnan asa qonaq shaqyrǵan. Atalǵan jaıt boıynsha karantın talaptaryn saqtamaı jumysyn jalǵastyrǵan toıhana ıesi men toı ótkizgen azamattan túsinikteme alyndy. Polısııa basqarmasynyń habarlaýynsha, jınaqtalǵan is-qujattar QR ÁQBtK-niń 425-baby boıynsha shara qoldaný úshin taýarlar men kórsetiletin qyzmetterdiń sapasy men qaýipsizdigin baqylaý basqarmasyna joldanǵan.
ShYMKENT