Nur-Sultan qalasyndaǵy Ulttyq neırohırýrgııa ortalyǵynda jańa radıologııa jáne radıohırýrgııa bólimi ashyldy, onda shvedtiń Elekta kompanııasy shyǵarǵan Leksell Gamma Knife® zamanaýı kesheni jumys isteı bastady, dep habarlaıdy Egemen.kz.
Ortalyqtyń ashylý saltanatyna Qazaqstan Respýblıkasynyń Premer-Mınıstri Asqar Mamın, densaýlyq saqtaý mınıstri Alekseı Soı jáne Nur-Sultan qalasynyń ákimi Altaı Kólginov keldi. Qazaqstan osyndaı joǵary tehnologııalyq jabdyqtarǵa ıe TMD-daǵy úshinshi jáne Ortalyq Azııadaǵy birinshi memleket ekenin aıta ketken jón.
«Gamma-pyshaq» – mıdyń ártúrli patologııalyq túzilimderin joǵary dáldikpen bir mezgilde sáýlelendirý arqyly joıýǵa arnalǵan qondyrǵy. «Gamma pyshaǵy» arqyly stereotaksıkalyq radıohırýrgııa ádisiniń máni zaqymdanǵan aımaqtyń bir ret jáne dál sáýlelenýinde. Tıimdiligi boıynsha mundaı emdi hırýrgııalyq operasııamen salystyrýǵa bolady, biraq sonymen birge ol anestezııasyz júrgiziledi, skalpelmen jumys isteýdi jáne keıinnen reanımasııany qajet etpeıdi, naýqastardyń jasyna eshqandaı shekteýler qoımaıdy.
– Bul biz úshin, jalpy qazaqstandyq neırohırýrgııanyń damýy úshin úlken oqıǵa. Qazaqstannyń barlyq aımaqtarynda dıagnostıkalyq jabdyqtardyń sany jetkilikti, sonyń arqasynda aýrýdyń alǵashqy kezeńderin anyqtaı bastadyq. «Gamma-pyshaqpen» osyndaı naýqastardy operasııasyz, asqynýsyz, ambýlatorııalyq jaǵdaılarda emdeýge bolady. Biz mamandardy aldyn ala daıyndadyq, «Gamma-pyshaqpen» burynnan jumys istep kele jatqan túrli ortalyqtarda oqyttyq – bul Pragadaǵy, Mılandaǵy, Máskeýdegi medısınalyq ortalyqtar, bizdiń strategııalyq seriktesimiz reseılik akademık N.N.Býrdenko atyndaǵy Ulttyq medısınalyq neırohırýrgııa ortalyǵy bolyp tabylady. Memleket densaýlyq saqtaý salasyn damytýǵa úlken kóńil bóledi jáne osyndaı qymbat qural-jabdyqtar satyp alý sonyń dáleli, – dep belgilep aıtty «Ulttyq neırohırýrgııa ortalyǵy» AQ basqarma tóraǵasy, professor, QR UǴA akademıgi Serik Aqsholaqov.
Chehııadan kelgen mamandar toby Nýr-Sultanda danalanǵan rejımde shyǵarylǵan jabdyqty ornatý jáne iske qosý úshin jumys istedi, al birinshi operasııany ótkizý úshin Býrdenko atyndaǵy reseıdiń neırohırýrgııa ortalyǵynyń radıohırýrgııa bólimshesiniń meńgerýshisi, RǴA korrespondent-múshesi, professor, medısınalyq ǵylymdar doktory Andreı Golanov keldi. Onyń qatysýymen radıologııa jáne radıohırýrgııa bóliminiń jergilikti mamandaryna taǵylymdama ótti. Oqý baǵdarlamalary aıasynda pasıentterdi tańdaý, emdeý jáne baqylaýdyń klınıkalyq aspektileri, «Gamma-pyshaq» qondyrǵysynda praktıkalyq jumys qamtyldy.
– Elekta úshin Nur-Sultandaǵy Ulttyq neırohırýrgııa ortalyǵynyń uzaq merzimdi seriktesi bolý – maqtanysh jáne abyroı. Biz Qazaqstanda Gamma-pyshaǵyn paıdalaný boıynsha qyzmetterdi usyna alatynymyzǵa da óte qýanyshtymyz. Sizderdiń kásibı qoldaryńyzdaǵy Gamma-pyshaǵy Qazaqstandaǵy, sondaı-aq kórshi elderdegi myńdaǵan pasıentterge oń nátıje beretinine senimdimiz.Biz Elekta kompanııasynda jarty ǵasyrdan astam ýaqyt boıy kóptegen elderde jasap kele jatqandaı, Qazaqstandaǵy densaýlyq saqtaý júıesiniń damýyna kómektesýdi jalǵastyrǵymyz keledi. Qazaqstanda neırohırýrgııa salasyn keremet jáne jarqyn bolashaq kútip turǵanyna senimdimin, - dedi Loran Leksell, Elekta kompanııasynyń negizin salýshy jáne Dırektorlar keńesiniń tóraǵasy.
«Gamma-pyshaq» kesheni memlekettik qarajat esebinen satyp alyndy, qazaqstandyqtar úshin emdi tegin kvotalar boıynsha alýǵa múmkindikteri bar. Buǵan deıin naýqastardy shetelge qymbat em alýǵa jiberýge týra kelgen. Sondaı-aq, Ortalyq Azııadaǵy jalǵyz radıologııa jáne radıohırýrgııa bólimi kórshi elderden kelgen naýqastarǵa joǵary tehnologııalyq medısınalyq kómek kórsetýge daıyn, bul Qazaqstanda medısınalyq týrızmniń damýyna serpin beredi.
«Gamma-pyshaq» keshendi jabdyǵyn iske qosý boıynsha úlken jumysty shvedtik Elekta-nyń qazaqstandyq seriktesi - «Dıagnostıka Ortalyq Azııa» kompanııasy ótkizdi. Pandemııanyń qıyn kezeńinde jabdyqty jetkizýge, ony ornatýǵa, kadrlardy daıarlaýǵa jáne óndirýshiniń mamandary men Neırohırýrgııa ortalyǵynyń ózara árekettestigin uıymdastyrýǵa baılanysty barlyq máseleler jedel ári tıimdi sheshildi.
Arman Oktıabr,
«Egemen Qazaqstan»