El maqtaǵan ınspektor

Byltyr  Ishki ister mınıstr­liginde ótken jıynda Prezıdent Qasym-Jomart Toqaev «Ýchaskelik ınspektorlar – naqty aýmaqtaǵy qyl­mys­tyń aldyn alýdaǵy eń mańyzdy tulǵa» dep olardyń jumy­syna joǵary baǵa bergen edi.

Petropavl qalasyndaǵy Ekinshi polısııa bólimshesiniń aǵa ýchaskelik ınspektory Esen Qońqashev sońǵy 10 jyldan beri osynaý tynymsyz jumysty abyroımen atqaryp keledi. «Jumysym halyqqa paıdasyn tıgizip jatsa, qýa­namyn. Halyqtan alǵan árbir alǵys bizdiń qyzmetke degen yntamyzdy arttyra túsedi», deıdi ol.

Esen Eslámuly – 1998 jyldan beri polısııa qatarynda qyzmet atqarady. Aldymen ol jedel qyzmette biraz jyl eńbek etken. 2012 jyldan beri aǵa ýchaskelik ınspektor qyzmetinde. Ýchaskede tórt ınspektor men bir kómekshi jumys isteıdi. Biraq kómek qajet bolǵanda belsendi stýdentter men volonterler kó­mekke tartylady. E.Qońqashev qyzmet ete­tin ýchaskesiniń aýmaǵynda 14 520 adam turady.

Joǵaryda atalǵan jıynda Prezıdent: «Halyqpen ashyq áńgime ótkizip, olardyń polısııadan neni kútetinin bilip otyrý kerek jáne kómek kerek bolǵanda únemi jaqynnan tabylýy kerek» degen talap qoıǵan edi.

Esen Eslámuly – naq osy talaptan shyǵyp, óziniń mindetin tııanaqty oryndap júrgen ýchas­kelik ınspektorlardyń biri. Onyń halyq aldynda bergen ese­bine burynǵy oblystyq polısııa departamenti bastyǵy qatysyp, júzdegen adamnyń ınspektordyń jumysyna aıtqan alǵysyn óz qulaǵymen estidi. Osy oqıǵa da sebep bolǵan shy­ǵar, qalanyń ýchaskelik ınspek­torlary arasynda Esen Qoń­qashevke birinshi bolyp pod­polkovnık ataǵy da berildi. Bul eńbektiń joǵary baǵalan­ǵan­dyǵynyń belgisi.

Esen óziniń ju­mysy týraly aıtqanda aǵyl-tegil sóıleıdi. Barlyq isi­ne maqtanmen emes, kásibı bilgirlikpen baǵa berip jat­qa­nyna rıza bolasyń. Eki uly da áke jolyn qýýdy maqsat etedi. Kelinshegi Jansaıa da kúıeýiniń tynymsyz jumysyna ábden úırenip alypty, otbasynda erine qashanda qoldaý kórsetip keledi.

Mine, ýchaskelik polıseıler arasynda óte sırek kezdesetin podpolkovnıktiń tynys-tirshi­ligi qysqasha aıtqanda osyndaı.