Shyǵys Qazaqstannyń medısınalyq uıymdaryna Qytaıdyń Sinovac bıofarmasevtıkalyq kompanııasy ázirlegen CoronaVac koronavırýsqa qarsy vaksınasynyń alǵashqy partııasy kelip tústi.
Densaýlyq saqtaý mınıstrligi Qazaqstan aýmaǵynda qoldanýǵa maquldaǵan bul preparat koronavırýs ınfeksııasyna qarsy vaksınalaý úshin qoljetimdi preparattardyń tórtinshisi. Bıyl 11 maýsymda Shyǵys Qazaqstanǵa qytaı vaksınasynyń birinshi jáne ekinshi komponentiniń 38 myń dozasy jetkizildi. Qazirgi ýaqytta ekpe barlyq medısınalyq uıymǵa taratyldy. Bul týraly baspasóz konferensııasynda Densaýlyq saqtaý basqarmasy basshysynyń orynbasary Elmıra Rahymbaeva habarlady. Onyń aıtýynsha, bul partııa óńirdiń 19 myń turǵynyna jetkilikti. 9 myń 500 doza О́skemenge, dál sonsha doza Semeıge berildi.
CoronaVac preparatymen vaksınalaý 14-28 kún aralyǵymen eki kezeńde júrgiziledi. Vaksına aýyr allergııalyq reaksııasy bar adamdarǵa, aýyr nevrologııalyq aýrýlary barlarǵa, júkti nemese bala emizetin áıelderge, 18 jasqa deıingi balalarǵa egilmeıdi. Immýndyq deńgeıine qaraı onkologııa, AITV, JITS bar azamattarǵa CoronaVac ekpesin saqtyqpen alý kerek. Prosedýradan buryn ýchaskelik dárigermen keńesken durys.
E.Rahymbaevanyń málimetinshe, búginde oblys turǵyndary vaksınalaýdan ótý úshin qalalar men aýdandardyń barlyq medısınalyq mekemelerinde Spýtnık V jáne CoronaVac preparattaryn tańdaı alady.
– Aqpannyń basynan bastap biz otandyq QazVac vaksınasynyń 6 myń dozasyn, 38 myń doza CoronaVac, shamamen 82 myń doza Spýtnık V preparattaryn aldyq. Taǵy 82 myń doza Hayat-Vax boldy. Qazir bul preparattarmen vaksınalaý prosedýrasy aıaqtaldy. Barlyǵy – 208 myń doza. Bizde reseılik preparattyń 59 myń dozasy bar. Keshe Spýtnık V ekpesiniń ekinshi komponentiniń 40 myń dozasyn aldyq, – dep atap ótti ol.
Osylaısha, óńirdiń 198 myń turǵyny koronavırýstan qorǵaldy. Qazanǵa deıin 747 myń shyǵysqazaqstandyqty egý josparlanýda. Halyq úshin qoljetimdilik pen jaılylyqty arttyrý úshin egý pýnktteriniń sany únemi artyp keledi.
О́skemen qalasynyń №2 emhanasynyń ýchaskelik qyzmetiniń bólim meńgerýshisi Áıgerim Sháripovanyń aıtýynsha, vaksınalaý bastalǵannan beri emhananyń egý pýnktinde 9 myńǵa jýyq adam ımmýndaýdan ótti.
– Aldymen biz medısına qyzmetkerlerin, pedagogterdi, polısııa men áskerı qyzmetkerlerdi vaksınaladyq. Qazir qala turǵyndarymen belsendi jumys isteımiz. Adamdar bizge senbi jáne jeksenbi kúnderi de keledi. Yńǵaıly bolý úshin egý pýnkti kún saıyn 20.00-ge deıin ashyq. CoronaVac vaksınasynyń birinshi jáne ekinshi komponentin aldyq, – dedi Á.Sháripova.
Sonymen qatar О́skemendegi «ADK-River», «Imperator» jáne «Evrazııa» saýda úılerinde ornalasqan medısınalyq núktelerde vaksınalaý ortalyǵy ashyldy.
– Barlyq egý pýnktinde vaksına jetkilikti. Biz sozylmaly aýrýlary bar adamdarǵa egýdi kózdep otyrmyz. О́ıtkeni bul sanattaǵy adamdarǵa indet tez juǵady, – dedi E.Rahımbaeva.
Aıta keterligi, mamandardyń jasap otyrǵan monıtorıngine sensek, vaksına alynǵan aýmaqtarda koronavırýs aýrýynyń sany soǵurlym az sekildi. Sondyqtan da medısınalyq uıymdardyń bas dárigerleri kásiporyndarda ekpe alý qajettiligi týraly túsindirý jumystaryn júrgizedi.
– Prezıdent Qasym-Jomart Toqaev balalarymyzdy osy aýrýdan barynsha qorǵaýymyz kerek ekenin atap ótti. Jaqynda muǵalimdermen sóılestik. Osy oraıda olardy eshkim májbúrlemeıtinin atap ótkim keledi. О́ıtkeni vaksına erikti túrde alynyp jatyr, – dedi E.Rahymbaeva.
Koronavırýstyń saldarynan keıbireýi reanımasııada aılap jatyr. Sodan keıin tolyq qalpyna kelýi úshin bir jyl qajet kórinedi. Vırýs óte qaýipti. Immýndyq júıege de áseri bar. Dárigerlerdiń aıtýynsha, vaksına alǵan adamǵa vırýs juqsa da jeńil ótedi.