Qabanbaı batyr aýylynyń turǵyndary qýanyshqa keneldi. Jergilikti atymtaı jomarttardyń elge degen aq nıetteri men peıilderi qoltyqtarynan demep, bolashaqqa degen senimderin nyǵaıta tústi.
«Táýelsizdikke taǵzym» dep atalatyn el táýelsizdiginiń tarıhy ekshelip, jarqyn jylnamasy ádiptep órilgen kezdesý barysynda kásipkerler medısına qyzmetkerleri men ýchaskelik polısııa ınspektorlaryna tolymdy syı-sııapat jasady. Aldymen jergilikti ambýlatorııaǵa arnaıy kóliktiń kilti tabys etildi. Aýyl úshin óte kerek kólik edi. Jaman tumaý jan alqymnan alyp turǵan kezde mundaı kómektiń máni óte zor. «Aıyrtas» jaýapkershiligi shekteýli seriktestiginiń basshysy Baqytjan Nuraqysheva kólikpen birge aýyl mektebine mýltımedııalyq jáne robottehnıka jabdyqtaryn syıǵa tartty. Shoq juldyzdaı shaǵyn aýyldyń oqýshylarynyń sapaly bilim alýyna jol ashyldy.
– Janashyr jandardyń arqasynda aýdanda alpystan astam elge qajetti joba júzege asyryldy. Jaqsylyq is qashanda jan jadyratady. Isker adamdar ózderiniń aq peıilderi arqyly jas urpaqtyń boıyna jaqsy qasıet sińirip jatyr – dedi aýdan ákimi Baqytbek Ospanbekov.
Bıyl aýdandaǵy aýyl sharýashylyǵy qurylymdarynyń basshylary Ivan Saýer, Mars Itpaev, Tımýr Pishenov, Maksım Bojko, Aıtqoja Baıjanov, Qanat Temirov bes birdeı jedel járdem kóligin satyp alyp berse, osy kásipkerlerdiń arqasynda ýchaskelik polısııa ınspektorlary da eki kólikke ıe boldy. Kóp-kórim kómek emes pe?! Kezdesý sońynda el dese et júregi eljirep turatyn mesenattarǵa Alǵys hattar men «Jomart júrek» jáne «Týǵan jer» atalymdary boıynsha syı-sııapat jasaldy.