Kásibı mereke kúninde elorda ákimi Altaı Kólginov elordalyq polısııa departamentiniń qyzmetkerlerine jańa qyzmettik avtokólikterdiń kiltin tabystady, dep habarlaıdy Egemen.kz.
Nur-Sultan qalasy PD qyzmettik avtokólikter parki «Hyundai Elantra» jáne «Hyundai Tucson» markaly otandyq óndiristiń 30 avtokóligimen tolyqty. Jyl sońyna deıin taǵy 11 avtokólik tapsyrylady. Máselen, ótken jyly ǵana elordalyq polısııa avtoparki taǵy 65 avtokólikpen tolyqqan bolatyn.
Qyzmettik avtokólikter patrýldik polısııa polkine, mamandandyrylǵan batalonǵa jáne ýchaskelik polısııa ınspektoryna berildi. Mundaı sharalar qoǵamdyq tártipti qamtamasyz etý jumysynda jyldamdyqty arttyrýǵa múmkindik beredi. Elordalyq polısııa departamentiniń qyzmettik avtokólikter parkin jańartý tártip saqshylarynyń jumys sapasyn arttyrýǵa septigin tıgizedi. Bul memleket qabyldaıtyn aýqymdy sharalar kesheniniń bir bóligi ǵana.
«Qurmetti polısııa qyzmetkerleri, sizderdi kásibı merekelerińizben shyn júrekten quttyqtaımyn! Sizderge qala turǵyndarynyń tynyshtyǵy men qaýipsizdigin, kóshelerdegi tártipti qamtamasyz etý sekildi úlken jaýapkershilik júkteledi. Búginge deıin myńdaǵan adamnyń ómirin qaýipten arashalap qaldyńyzdar!
Pandemııa kezinde de aldyńǵy shepte eńbek ettińizder: kúzet beketterinde kezekshilikte bolyp, qalanyń úzdiksiz jumysyn qamtamasyz ettińizder. Monıtorıngtik toptardyń quramynda bolyp, sanıtarlyq talaptardyń buzylýynyń aldyn alyp, koronavırýstyń taralmaýyna baǵa jetpes úles qosyp kelesizder.
El basshylyǵynyń tapsyrmasy boıynsha sizderge qolaıly jaǵdaılar jasaý úshin jumys isteımiz: Birinshi. Ishki ister organdaryn materıaldyq-tehnıkalyq jaraqtandyrý. Búgin avtopark taǵy 30 avtokólikpen tolyqty. Jyl sońyna deıin qosymsha 11 birlik arnaıy tehnıka jabdyqtaýdy josparlap otyrmyz. Byltyr osyndaı 65 kólik bólingen bolatyn.
Ekinshi. Servıstik modelge kóshý
Halyqpen jumystyń servıstik modelin engizý Memleket basshysynyń tapsyrmasy boıynsha «Polısııa qadamdyq qoljetimdilikte» qaǵıdaty boıynsha júzege asyrylady. Osy joba aıasynda qala aýdandary men turǵyn úı massıvterinde 16 zamanaýı modýldik polısııa beketin ornatamyz. Budan bólek, Esil aýdany polısııa basqarmasynyń jańa ákimshilik ǵımaraty ashylǵan bolatyn. Sonymen qatar bıyl ýchaskelik polısııa pýnktterine jóndeý jumystary júrgiziledi.
Úshinshi. Turǵyn úı máselesi, syıaqy
Qazaqstandyq turǵyn úı kompanııasy (QIK) jelisi boıynsha qatysýshylar sanaty keńeıtildi – oǵan medısına qyzmetkerlerinen, muǵalimderden, áleýmettik qyzmetkerlerden, mádenıet jáne sport qaıratkerlerinen bólek polısııa departamenti men tótenshe jaǵdaılar departamentiniń qyzmetkerleri endi. Bul jańalyq ótken jyldan bastap iske qosyldy. Bıyl 100 páter beriledi. Sonymen qatar, tártip saqshylary kezekke sáıkes ózge de turǵyn úı baǵdarlamalary boıynsha baspanaly bolady. Sondaı-aq, tártip saqshylaryna syıaqy da qarastyrylǵan», dedi elorda ákimi Altaı Kólginov.
Nur-Sultan qalasy polısııa departamentiniń bastyǵy Erjan Sádenov qala ákimdigine turaqty qoldaý kórsetip kele jatqany úshin rızashylyǵyn bildirip, jyl saıyn elordalyq polısııanyń materıaldyq-tehnıkalyq bazasy jaqsaryp, qyzmetkerlerdiń áleýmettik-turmystyq máseleleri sheshilip jatqanyn atap ótti.
«Jańa tehnıka qylmysqa jáne qoǵamdyq tártipti buzýǵa qarsy kúreste polısııa jumysynyń jedeldigin, úılesimdiligin jáne tıimdiligin arttyryp, azamattardyń ótinishterine ýaqtyly den qoıýǵa múmkindik berdi.
Memleket basshysynyń tapsyrmasy boıynsha «polısııa qadamdyq qoljetimdilikte» qaǵıdaty júzege asyp jatyr. Osy tapsyrmany iske asyrý maqsatynda QR Ishki ister mınıstri polısııa general-leıtenanty E.Z. Turǵymbaev 2021 jyldy «quqyq buzýshylyqtyń aldyn alý jyly» dep jarııalady. Quqyqtyq tártipti qorǵaý, azamattardyń qaýipsizdigi men tynyshtyǵyn qamtamasyz etý biz úshin basty mindet bolyp sanalady», dep atap ótti Nur-Sultan qalasy polısııa departamentiniń bastyǵy general-maıor Erjan Sádenov.
Sonymen qatar qyzmettik mindetterin adal atqarǵany jáne erekshe kózge túsken polısııa qyzmetkerlerine jumysta joǵary nátıjelerge qol jetkizgeni úshin elorda ákimi Altaı Kólginov alǵys hattar tabys etti. Olardyń arasynda Jedel-krımınalıstıkalyq bólim bastyǵynyń orynbasary polısııa podpolkovnıgi O. Kýzmenko, ýchaskelik polısııa ınspektory kapıtan A. Baqtybaev, mamandandyrylǵan batalon ınspektorlary aǵa leıtenanttar – R. Jumabaev jáne S. Kım jáne basqalary da bar.