Qaıyrymdy jandardyń kóptigi, janyndaǵyǵa jan jylýyn tógetin jomarttyq qashanda kóńil demdeıdi. Osy oraıda el Prezıdenti Qasym-Jomart Toqaev: «Eriktilerimizdi maqtan tutamyn jáne olardyń orasan zor ári paıdaly jumystaryna, ásirese, pandemııa kezindegi eńbekteri úshin rızashylyǵymdy bildiremin. Volonterlik ýaqytsha naýqan emes, ol on myńdaǵan azamattarymyzdyń jan tebirenisi. Biz árqashanda birgemiz!» degen bolatyn.
Aýdan jurtshylyǵy qaýip-qateri álemdi qobaljytyp turǵan pandemııa kezinde ıgi murattar tóńireginde toptasa bildi. El ishindegi birliktiń bekemdigi, yrysty yntymaqtyń jan súısinter jarasymy osy kezde baıqaldy. El Prezıdenti Qasym-Jomart Toqaevtyń Volonter jyly týraly bastamasynan keıin izgi nıet, adal kóńil býlyǵyp turǵan bulaqtyń kózi ashylǵandaı býyrqanyp sala berdi.
Aldymen aýdandaǵy qaıyrymdy jandar qanattasa birigip, jospar jasady. Atqarylar is-qımyldy kóńil tarazysynda baǵamdap, ekshep aldy. Obrazǵa orap aıtqanda, ózgege qoń etin kesip berýge daıyn turatyn jany jomart, peıili keń eriktiler toby áldeneshe ret áleýmettik qaıyrymdylyq aksııalaryn ótkizip, izgi nıetpen izetti qamqorlyq jasap, kómekke zárý adamdarǵa qol ushyn sozyp, qolǵanat bola bildi. Olar ótken qysta aýdannyń eldi mekenderindegi jalǵyzilikti jandardyń aýlalaryn tazartyp, baǵymdaǵy maldaryna jem-shópterin jetkizip berip, sozylmaly syrqaty bar adamdarǵa emhanadan tegin dári-dármekterin ákelip berdi. Kóktem shyǵa ondaǵan zeınetkerdiń baý-baqshasyndaǵy egistik jerin jyrtyp, aýlalaryn kúl-qoqystan tazalap, aq alǵystaryn arqalady. «Qyzyl aımaqtyń» qursaýynda turǵan kezde kútimsiz qalǵan turǵyn úılerin áktep, sharbaqtaryn túzep, dálizderin syrlap, kóztartarlyq etip qulpyrtyp qoıdy. Osyndaı janashyrlyqtyń nátıjesinde kómekke zárý adamdardyń da eńsesi kóterilip, ózderiniń jalǵyz emes ekendikterin uǵyp, qoǵamnyń qaıyrymdylyǵyna tánti bolysty.
Árıne, erikti bolý izgi júrektiń izetti buıryǵy. Bıyl aqpan aıynyń basynda qurylǵan eriktiler korpýsy az ýaqyttyń ishinde aýqymdy sharýalar atqarýymen kózge tústi. Olar árqıly áleýmettik jobalardy qolǵa alyp, ondaǵan otbasyna qamqorlyq kórsetti. Qıyn kezde uıysa uıymdasqan sharapatty sharýa óńir jasyl aımaqtyń sanatyna engende de toqyraǵan joq. Kópbalaly, áleýmettik jaǵynan az qamtylǵan otbasylardyń tynys-tirshiligi basty nazarda. Ortaq iske oblystyq jáne aýdandyq máslıhattardyń Nur Otan partııasynan saılanǵan depýtattary da atsalysýda. Olar Atbasar qalasyndaǵy №2 arnaıy mektep-ınternatqa kóp kómektesti. Densaýlyǵynda aqaýy bar balalardy bir ýaqyt seıiltip, tabıǵat aıasynda serýen uıymdastyrdy. Jaı ǵana serýen emes, óńirdegi tarıhı oryndardy kórsetip, qasıetine boılatqan mazmundy sapar. Sapardan soń balalar torǵaılarǵa uıa jasap, qustarǵa jem shashatyn astaýshalar ornatty.
Atbasarlyq eriktiler adam kóńilin jadyratýmen qatar, tabıǵatty kóldeneń jatqan kóp buraýdan aryltyp, sulýdaı sylana túsýine yqpal etti. Birneshe márte aýdan eldi mekenderinde senbilikter uıymdastyryldy. Eńkeıgen káriden eńbektegen balaǵa deıin qatysqan ıgi is kezinde kósheler tazalanyp, kúl-qoqys arnaıy oryndarǵa shyǵaryldy.
«Bir jeńnen qol, bir jaǵadan bas» shyǵarǵan birlik aýdandaǵy ondaǵan ulttyń izgi muratyn bir arnada toǵystyryp, qaı kezde de, qandaı synaqta da birge ekendikterin uqtyryp berdi. Bálkim, qıyndyqty qabyrǵasy qaıyspaı kóterip alatyn qaısarlyq osyndaı yntymaqtan týyndaıtyn shyǵar.
Aqmola oblysy,
Atbasar aýdany