Almatydaǵy Prezıdent arhıvinde TMD elderi jas arhıvshileriniń IV Jazǵy mektebiniń ashylýy ótkizilip, jumysyn bastady. 2017 jyly Qazaqstan Respýblıkasy Prezıdentiniń Arhıvi, Reseı memlekettik gýmanıtarlyq ýnıversıteti jáne Ál-Farabı atyndaǵy Qazaq ulttyq ýnıversıteti birlesip, tarıhty saqtaýshylarǵa halyqaralyq bilim berý jobasyn uıymdastyrýdy bastaǵan bolatyn. Dástúrge aınalǵan jastar forýmy bıyl birinshi ret beınekonferensııalyq baılanys túrinde ótkizilýde.
Is-shara Qazaqstan Respýblıkasy Táýelsizdiginiń 30 jyldyǵyn atap ótý aıasynda uıymdastyryldy. Jazǵy mekteptiń ashylý saltanatynda Prezıdent Arhıviniń dırektory Jámılá Ábdiqadyrova, Reseı memlekettik gýmanıtarlyq ýnıversıtetiniń ǵylymı jumys boıynsha birinshi prorektory Olga Pavlenko, Ál-Farabı atyndaǵy qazaq ulttyq ýnıversıteti Tarıh fakýltetiniń dekany Meńdigúl Noǵaıbaeva, Búkilreseılik arhıv isi jáne qujattaný ǵylymı-zertteý ınstıtýtynyń dırektory Pavel Kıýng, Prezıdent Arhıviniń janyndaǵy Qoǵamdyq keńes tóraǵasy Borıs Japarov forým qatysýshylaryna arnap quttyqtaý sóz sóıledi.
Qazaqstan Respýblıkasy Prezıdenti Keńsesiniń basshysy Nurlan Ońjanovtyń Jazǵy mektep qatysýshylary men qonaqtaryna quttyqtaý sózi oqylyp, onda qujattaný úrdisin sıfrlandyrý men odan ári jetildirýge baılanysty birqatar máselelerdi qarastyrý, IT tehnologııalar salasynyń bilikti mamandary men bedeldi sarapshylaryn tyńdaý múmkindigine toqtalyp, mazmundy pikirtalasqa qatysyp, baǵaly tájirıbe almasýǵa shaqyrdy. Arhıvshi mamandarmen ótetin mundaı kezdesýler arhıv isindegi dástúrdi saqtap, damý basymdyqtarynyń qalyptasýyna, nyǵaıtylýyna ákeletinin aıtty.
Koreıa Ulttyq arhıviniń prezıdenti Dje Hı Choı (Jae-Hee Choi) forým taqyrybynyń sıfrly dáýirdegi ózektiligin atap ótip, qatysýshylardyń jumysyna tabys tilep, quttyqtaý joldady.
Búgingi kúndegi sıfrlandyrýmen baılanysty búkil álemdegi aýqymdy ózgerister qundy aqparattardy saqtaýǵa baǵyttalǵan pármendi sharalardy qajet etedi. Málimetterdiń joıylý qaýpi joǵary bolsa, saldary apatqa ákeledi. Sondyqtan búginde aqparattyń túpderekterin saqtaýdyń bilikti mamandary – arhıvshilerge degen talaptar ósýde, al bizdiń memleketterge jas daryndy kadrlar qajet. Kásibı bilimin jetildire otyryp, ártúrli memleketterdiń mamandarymen tájirıbe almasatyn alańdy uıymdastyrý ýaqyt talaby bolyp barady. Kásibı memlekettiń qalyptasýy úshin óziniń isin meńgergen, mamandyǵyn súıetin kásibı kadrlardy qoldap, ósirý qajet. Ásirese tarıhı qujattyq jadyny saqtaýda kásibıligin tanytatyn arhıvshi mamandar keleshek býyn úshin qajet.
Bıylǵy is-sharada arhıv isi mamandary men oqytýshylary – reseılik Mıhaıl Ların, Pavel Kıýng, Iýlııa Iýmasheva, Polsha arhıviniń ókili Artýr Gorak, Fınlıandııadan kelgen Dmıtrıı Frolov, belorýssııalyq Andreı Rybakov, ońtústikkoreıalyq Kım Djepıon men qazaqstandyq Álııa Mustafına, Baıan Jumataeva jáne Baqyt Nurpeıisova spıker boldy. Jazǵy mektepke Qazaqstan, Ázerbaıjan, Armenııa, Belorýssııa, Qyrǵyzstan, О́zbekstan, Reseı Federasııasy, Tatarstan arhıv mekemeleriniń 270-ten astam mamany qatysty. Qazirgi oqytýdyń onlaın formaty geografııalyq sheńberdi keńeıtip, birinshi ret Ázerbaıjan men Armenııadan arhıvshiler qosyldy.
Uıymdastyrýshylar V Jazǵy mektep kelesi jyly dástúrli formatta ótetinine úmit bildirip, TMD arhıv mekemeleriniń jas mamandary Almaty qalasyna jınalyp, tanysyp, tájirıbe bólisip, kásibı arhıvshiler álemdik tarıhı muranyń saqtalýyna ortaq úlesin qosady dep senedi.
ALMATY