...Jedel jelige «páter tonaldy» degen kezekti habar kelip túsken sát. Urylardyń ákkiligi sondaı, tyrnaqtaı iz qaldyrmaıdy. Esikti de eppen ashyp, jasyrylǵan altyn buıymdardy, aqshalardy op-ońaı taýyp, alyp kete beredi. Bul 2011 jyl-tuǵyn. Rýslan О́mirbekulynyń da qalalyq polısııa bólimine qyzmetke endi ornalasyp jatqan ýaqyty. Jas mamanǵa alǵash berilgen tapsyrmalardyń biri – qýlyǵyna quryq boılamaıtyn sol urylardy qolǵa túsirý edi.
Mınıstrliktiń buıryǵymen urylardy ustaý toby qurylyp, quramyna Rýslan О́mirbekuly bastaǵan jedel ýákilder, iz kesýshi jáne krımınalıst maman bekitilip berildi. Rýslan О́mirbekuly áý bastan jedel ýákil qyzmetine ornalasqan. Jumys ońaı emes, jas maman úshin tájirıbe jınaqtaýǵa naǵyz orta osy edi. Degenmen, bilimdi polıseıge biliktiligin arttyrý anaǵurlym qıynǵa túspeýi kerek. Katonqaraǵaı aýdanyndaǵy aıadaı ǵana Qabyrǵa aýylynda týyp-ósip, Reseıdiń Volgogradyna oqýǵa túsken Rýslannyń bilimge degen qulshynysy joǵary edi. Ol oqýmen qatar sportty da birge alyp júrdi. Mektep jasynan erkin kúrespen aınalysty. Keıin qoıan-qoltyq tóbelesten akademııanyń quramasynda óner kórsetti.
– Berilgen ár tapsyrmaǵa jaýapkershilikpen qaraýymyz kerek. О́ıtkeni, bul jerde bireýdiń taǵdyry, endi bireýdiń bizge degen senimi bar. Urylardy ustaý úshin de bar kúshimizdi saldyq. Toptaǵy mamandar da bilikti azamattar. Biraq, tonaý kásibı deńgeıde júzege asyp jatqany oqıǵa oryndarynda kórinip turatyn, – dep alǵash qyzmetke kirisken jyldaryn eske aldy maıor R. О́mirbekuly.
Ol jyldary qazirgideı emes, páter tonaý órship turdy. Urylar da biledi, kez kelgenniń úıine túspeıdi. Aýqatty, baı-baǵlandardyń páterin kózdegen. Aptalap úı ıelerin ańdyp, úıde qaı ýaqytta bolmaıtyndaryn zerttegen. Baıdyń úıi ekenin qaıdan bilgen deısiz ǵoı. 2011 jyldary ekiniń biri úıine kondısıoner ornatpaıtyn. Qymbat kólikti de árkim mine bermeıtin. Iаǵnı, tereze túbindegi kondısıoner qurylǵylaryna, plastıkti terezelerge nazar aýdarǵan. Páterge engende de bes-on mınýt qana aınalatyn. Saýsaq izderin de qaldyrmaýǵa tyrysqan. Biri esik ashsa, endi biri syrtta qaýipsizdikti baqylap turǵan... Dese de, bir qatelik ketýi kerek edi; urylar podezdiń esigindegi magnıtke saǵyz japsyryp ketip júrgen. Esik kiltsiz ashylýy úshin. Ony ár detalǵa mán berip júretin jedel ýákil qyzmetkeri Rýslan О́mirbekuly baıqaǵan. Keıin kóshedegi beınekameralar arqyly kúdiktiler qolǵa túskende genetıkalyq saraptama jasap, tonaý faktisine dálel bolǵan.
– Páter tonaýshylar tobynyń alty-jeti múshesin ustadyq. Sonda 51 epızod anyqtaldy. Onyń 19-y aýyr qylmys. Aýyr dep otyrǵanym, quny 500 AEK-ten asatyn altyn buıymdar, aqsha, baǵaly zattar tonalǵan. Baǵaly zat bolǵanda da usaq-túıek emes, qundyzdy ishikterdi qoldy qylyp júrgen, – deıdi Rýslan О́mirbekuly.
Osy tektes úlken qylmystardy ashýǵa úlesin qosyp júrgen jas mamannyń qyzmeti satylap óse bergen. Eńbegi elenip, Elbasynyń qolynan Alǵys hat ta aldy. Respýblıkanyń úzdik jedel ýákili ataǵyn jáne alǵan. Tize bersek, jetken jetistikteri, marapattary óte kóp. Qyzmetin kishi jedel ýákildikten bastaǵan Rýslan О́mirbekuly búginde Ertis polısııa bóliminiń basshysy. Jas ta bolsa, bas bolyp júrgen polıseı qyzmetti endi bastaǵan mamandarǵa baǵyt-baǵdaryn berip, kórgen-bilgenin úıretip júr. Eń qýanarlyǵy, qazirgi tańda ury ataýly anaǵurlym azaıǵan.
О́skemen