Nur-Sultan qalasynyń ákimi Altaı Kólginov Instagram paraqshasynda pandemııa kezinde kásipkerlerge jasalǵan jaǵdaıdy aıta kele 97 myńnan astam kásipker jalpy somasy 31 mlrd teńge bolatyn salyqtan bosatylǵanyn málim etti, dep habarlaıdy elorda ákimdiginiń resmı saıty.
«Bizge júktelgen mindetterdiń biri – kásipkerlerimizdi qoldaý. Qazir osy baǵytta tıisti jumystar júrgizilip jatyr. Pandemııa kásipkerlerdiń jumysyna aıtarlyqtaı áser etkeni belgili. Memleket óz kezeginde bul baǵytqa ýaqytyly kómek kórsetti: salyqtar men nesıeler tóleý keıinge qaldyryldy; eń kóp zardap shekken nysandar bıýdjetke tólenetin tıisti tólemderden bosatyldy. Osylaısha, 97 myńnan astam kásipker jalpy somasy 31 mlrd teńge bolatyn salyqtan bosatyldy. TJ rejımi kezinde mańyzdy salalar úshin «jasyl» dáliz uıymdastyryldy. Bul olarǵa qalanyń blok-beketterinen kedergisiz ótýine múmkindik berdi. Al «Ashyq» baǵdarlamasy boıynsha kóbisi óz qyzmetin qaıta bastady.
Budan basqa, shyǵyndardy ońtaılandyrý kezinde 25,7 mlrd teńgeden asa qarjy ekonomıkanyń naqty sektoryn qoldaýǵa jáne ınfraqurylymdy damytýǵa baǵyttaldy. Bıznestiń jol kartasy boıynsha kásipkerlik salasynda jaǵdaılar jeńildetildi. Jyl basynan beri 20,7 mlrd teńgege myńnan astam joba qoldaý tapty.
О́ńirlik kásipkerler keńesimen kezdesýde birqatar másele talqylandy: jumysshy kadrlardyń tapshylyǵy, ınjenerlik jelilerdi júrgizý prosesi, MIB qurý jáne damytý. Al otandyq taýar óndirýshilerdi qoldaý, týrıstik sala, «Ashyq» jobasyn odan ári damytý sekildi máseleler bólek talqylandy. Bul qysqa merzimde birqatar mańyzdy problemany sheshýge, al uzaq merzimdi júıeli máselelerdi qolǵa alýǵa múmkindik beredi.
2019 jyldyń kúzinen bastap qalalyq damý akseleratory iske qosyldy. Bul belsendi turǵyndar, qoǵamdyq uıymdar, sarapshylar qatysatyn top bolyp esepteledi. Onda máselen ekologııa, qoǵamdyq kólikti damytý, PIK-ten MIB-ke ótý mehanızmi sekildi túrli máseleler qaraldy.
Kelip túsken saýaldar birden qolǵa alyndy», dep jazdy elorda ákimi.