Pavlodarda jastar arasynda tóbeles shyǵyp, bireýi aýrýhanaǵa tústi. Atalǵan faktige qatysty QR QK 293-baby boıynsha sotqa deıingi tergeý bastaldy, dep habarlaıdy Egemen.kz Ravlodarnews.kz saıtyna silteme jasap.
Oblystyq polısııa departamentiniń málimetinshe, 24 maýsym kúni saǵat 21.20-da polısııaǵa qalalyq saıabaq mańyndaǵy «Belıs» dámhanasynyń janynda soqqyǵa jyǵylǵan jigit jatqany týraly habarlama túsken.
- Oqıǵa ornyna kelgen polısııa qyzmetkerleri úsh jas jigittiń dámhanada alkogol ishkenin anyqtady. Saǵat 20.30 shamasynda mekeme kúzetshileri olardan dámhanadan ketýdi suraǵan, óıtkeni jigitter agressıvti áreket ete bastaǵan. Olardyń bireýi kóshede ótip bara jatqan adammen janjaldasyp, sońy tóbeleske ulasqan, - dedi polısııa departamenti bastyǵynyń birinshi orynbasary Jasqaırat Qaıyrov.
Oqıǵa saldarynan murny jaraqattanǵan jas jigittiń biri aýrýhanaǵa jetkizildi. Tóbeleske qatysýshylardyń barlyǵy anyqtaldy.Oqıǵanyń mán-jaıy men sebepteri anyqtalýda.