Jýyrda Birikken Arab ámirlikteriniń (BAÁ) Dýbaı qalasynda ótken Azııa chempıonatynda jeńis tuǵyryna kóterilgen bylǵary qolǵap sheberleri aqshalaı syılyqqa ıe boldy, dep habarlaıdy Egemen.kz.
Qazaqstannyń áıelder quramasy Parsy shyǵanaǵyndaǵy jarysta keremet kórsetkishke qol jetkizip, segiz birdeı sulýymyz altynnan alqa taǵynǵan edi. Elge oralǵannan keıin olardyń erligi elenip, chempıondyq ataqqa qol jetkizgen ár burymdyǵa 10 myń AQSh dollarynan tabys etildi. Áıelder men erlerdi qosa alǵanda jerlesterimiz barlyǵy 16 (8 altyn+6 kúmis+2 qola) júldeni qorjynǵa saldy. Qazaqstan boks federasııasynyń prezıdenti Keńes Raqyshevtyń qatysýmen Almatyda ótken aıtýly shara barysynda kúmispen kúptelgenderge 5 myń jáne qola medaldi moıyndaryna ilgenderge 2,5 myń dollar mólsherinde qarjy sertıfıkatyn berdi. Sonymen qatar, ulttyq qurama bapkerleri, boksshylardyń jeke jattyqtyrýshylary, keshendi-ǵylymı top músheleri de aqshalaı jáne basqa da baǵaly syılyqtardan qur qalǵan joq.
– Tarıhı jeńiske qol jetkizgen qyzdarymyzdy Memleket basshysynyń ózi quttyqtaǵanyn jaqsy bilesizder. Prezıdenttiń quttyqtaýy bizder úshin asa qundy. Sebebi, osy kúnge deıin birde-bir memlekettiń áıelder quramasy dál bizderdeı tolaǵaı tabysqa qol jetkizgen emes. Sondyqtan da komandamyzdyń osy jarqyn jeńisi biz qatty marqaıtyp otyr. Alda Olımpııa oıyndary menmundalap tur. Qazaqstannyń bylǵary qolǵap sheberleri Tokıodaǵy dodada da joǵary deńigeıdi óner kórsetedi dep úmittenemiz, – deıdi Keńes Raqyshev.
Ǵalym SÚLEIMEN,
«Egemen Qazaqstan»