Belarýs tarapynyń bastamasy boıynsha Prezıdent Qasym-Jomart Toqaev Aleksandr Lýkashenkomen telefon arqyly sóılesti, dep habarlaıdy Egemen.kz Aqordanyń resmı saıtyna silteme jasap.
Áńgimelesý barysynda memleket basshylary Qazaqstan men Belarýs arasyndaǵy kópjaqty yntymaqtastyqtyń, strategııalyq seriktestik pen odaqtastyqtyń qazirgi jaǵdaıyn jáne ony nyǵaıtýdyń perspektıvalaryn talqylady.
Taraptar ózara saýda-sattyq kólemin arttyrýǵa, mashına jasaý, aýyl sharýashylyǵy, kólik jáne basqa da salalardaǵy birlesken jobalardy júzege asyrýǵa mán bere otyryp, saýda-ekonomıkalyq yqpaldastyq pen óndiristik kooperasııany jan-jaqty jandandyrýǵa erekshe nazar aýdardy.
Budan bólek Prezıdentter óńirdegi epıdemıologııalyq ahýal, sondaı-aq, eki el halqyn jappaı vaksınalaý úshin qabyldanyp jatqan sharalar jaıynda pikir almasty. Osy rette Memleket basshylary COVID-19 pandemııasynyń teris saldaryn eńserý jónindegi úılesimdi is-qımyldardy jalǵastyrýǵa nıetti ekenin naqtylady.