270 myń tonna balyq ósiriledi

Komıtet basshysynyń aıtýynsha, balyq ósirý kólemin ulǵaıtý balyq ósirýge jaramdy sý aıdyndaryn paıdalaný, sondaı-aq jańa ınvestısııalyq-ındýstrııalyq balyq ósirý jobalaryn iske asyrý jáne jumys istep turǵan sharýashylyqtardy jobalyq qýatyna deıin jetkizý esebinen josparlanyp otyr. 2030 jylǵa deıin 1 283 jańa balyq ósirý sharýashylyǵy qurylyp, jumys istep turǵan 288 sharýashylyqtyń ósirý kólemi artpaq. Jobalar ár óńirdiń erekshelikterine qaraı bólingen jáne jergilikti atqarýshy organdar bekitken balyq sharýashylyǵyn damytýdyń óńirlik baǵdarlamalarynda kórsetilgen. Qoıylǵan maqsattarǵa qol jetkizý úshin 10 jyl ishinde 340 mlrd teńge jeke ınves­tısııalar tartý jáne memlekettik bıýdjetten shamamen 200 mlrd teńge bólý kózdelip otyr.

«2021 jyly jumys istep turǵan balyq ósirý sharýashylyqtary esebinen 12,8 myń tonna balyq ósirý kútilýde. Jyl basynan beri shamamen 7,6 myń tonna taýarly balyq ósirildi. Balyq sharýashylyǵyn (akvaósirý) damytý úshin jaǵdaı jasaý maqsatynda jumys­tardy segiz baǵyt aıasynda júrgiz­bekpiz. Alǵashqysy – balyq sharýa­shy­lyǵy sý aıdyndaryn taýarlyq balyq sharýashylyǵyn júrgizý úshin kásip­shilik sý aıdyndarynan aýystyrý qaǵıdalary bekitildi. Ekinshisi – zańnamalyq deńgeıde paıdalanýshynyń tor sharýashylyǵyn júrgizý úshin kásip­shilik balyq sharýashylyǵy ýchas­kesin paıdalaný quqyǵy kózdelgen. Úshin­shiden, sharýashylyqty júrgizýge arnalǵan úlgi shart bekitildi, onyń naqty merzimi 49 jyl bolyp belgilendi. Buryn kelisimshart jasasý merzimi 5 jyldan 49 jylǵa deıin bolatyn. Tórtinshi jáne besinshi nusqa boıynsha balyq ósirýshilerge qoıylatyn artyq talaptar men balyq ósirý sharýashylyqtaryn sý qorǵaý beldeýine ornalastyrý boıynsha shekteýler alynyp tastaldy», dedi N.Júnisov.

Sonymen qatar balyq ósirý toǵan­dary men basseınderin salý kezinde joba­lyq-smetalyq qujattamany ázirleý jáne memlekettik saraptamanyń qory­tyndysyn alý jónindegi ta­laptardyń da kúshi joıylǵan. Al bıznes budan bylaı aýyl sharýashylyǵy maqsatyndaǵy jerlerde balyq ósirý sharýashylyqtaryn salý kezindegi shyǵyndardy óteýden bosatylady. Segizinshi nusqa negizinde memlekettik qoldaýdyń qoldanystaǵy sharalary keńeıtilgen. Bular – balyq ósirý-bıologııalyq negizdemeler; balyq ósirý materıalyn satyp alý; dárilik preparattar; baǵaly balyq túrleriniń jóndeý-analyq tabyndaryn satyp alýǵa jáne kútip-ustaýǵa jumsalatyn shyǵyndar qunyn 50 paıyzǵa deıin sýbsıdııalaý.

Spıker, sondaı-aq komıtet Qazaq­stan­da balyq sharýashylyǵyn júrgizý úshin barynsha qolaıly jaǵdaılardy py­syqtap jatqanyn atap ótti, sondyqtan ol balyq sharýashylyǵy sýbektilerin, ınvestorlardy jáne nıet bildirgen barlyq bız­nesmendi balyq ósirýmen aınalysýǵa shaqyrdy.

Ol qazirgi kezde baǵdarlamany iske asyrý jónindegi jumystarmen qatar balyq resýrstarynyń tabıǵı popýlıasııasyn saqtaý jáne ulǵaıtý boıynsha sharalar qabyldanyp jatqanyn, atap aıtqanda, brakonerlikpen kúres, balyq aýlaýdy retteý jáne balyq resýrstaryn jasandy túrde molaıtý júzege asyrylyp jatqanyn atap ótti. Máselen, 2021 jyldyń basynan bastap memlekettik ınspektorlar 1 800-ge jýyq ákimshilik quqyq buzýshylyqty anyqtap, 23,2 mln teńge aıyppul salǵan. Onyń 15,4 mln teńgesi óndirilip alynǵan. Sonymen birge Narıman Júnisov komıtet ótkizetin «Bekire», «Ýyldyryq shashý», «Taza sý aıdyndary» tabıǵatty qorǵaý aksııasynyń qorytyndylary týraly da habarlady.

Jalpy, elimizdiń balyq sharýashy­lyǵynyń qory óte aýqymdy. Salanyń ǵalymdary men sarapshylarynyń baǵa­laýy boıynsha balyq sharýa­shylyǵynyń áleýeti jylyna 600 myń tonna taýarlyq balyqqa baǵalanady. Memleket basshysy Q.Toqaevtyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynda elimizdiń balyq salasyn damytýǵa erekshe nazar aýdarý qajettigi atap ótildi. Osyǵan baılanysty Úkimet­tiń 2020 jylǵy 31 jeltoqsandaǵy №955 qaýlysymen QR EGTRM Balyq sharýashylyǵy komıteti qurylyp, jumys isteı bastady.