Qyzylqoǵa aýdanynda Taısoıǵan dep atalatyn aýyl bar. Elimiz táýelsizdik alǵannan keıin munda aýyldyq okrýg quryldy. Qazir aýyldaǵy 134 otbasyda 877 turǵyn bar. Sondaı-aq 4 kásipkerlik nysan men 47 sharýa qojalyǵy jumys isteıdi.
Bul aýyldyń ózge eldi mekenderden aıyrmashylyǵy joq. Biraq ózgelerge úlgi etýge bolatyndaı jóni bar. О́ıtkeni aýyl turǵyndarynyń aıtýynsha, ýchaskelik polısııa ınspektorlyǵyna polısııa kapıtany Ǵalamat Aldanbaev taǵaıyndalǵaly birde-bir buzaqylyq oryn almaǵan. О́zge de qylmys tirkelmegen. – Aýylymyz shaǵyn, turǵyndar birin-biri jaqsy biledi. Munda áleýmettik jaǵdaıy óte tómen otbasylar joq. Tipti otbasylyq kıkiljiń de bolǵan emes. Byltyr aýylymyzǵa qyzmetke kelgen ýchaskelik polıseı turǵyndarmen til tabysa alady. Ár úıdi kúndelikti aralaıdy. Turǵyndardyń jaǵdaıyn bilip turady. Qazir aýylymyzda buzaqylyq sap tyıyldy, – deıdi Taısoıǵan aýyldyq aqsaqaldar keńesiniń tóraǵasy Túzenbaı О́rbisinov. Ýchaskelik polısııa ınspektory, polısııa kapıtany Ǵalamat Aldanbaev Taısoıǵanda byltyrdan beri qyzmet atqarady. Ol 2015 jyly Qyzylqoǵa aýdandyq jergilikti polısııa qyzmeti bólimshesine ýchaskelik polısııa ınspektorynyń kómekshisi bolyp jumysqa qabyldanypty. Sodan beri alys aýdandaǵy qoǵamdyq tártiptiń saqshysy retinde tájirıbe jınady. Taısoıǵanǵa kelgenge deıingi qyzmetin Tasshaǵyl aýylynda atqarǵan. – Taısoıǵan aýylynda jaǵdaı turaqty. Qylmystyq oqıǵalar tirkelgen joq. Bul aýylda buryn sottalǵandar, ne polısııanyń profılaktıkalyq baqylaý esebine alynǵan adamdar turmaıdy. Aýyl turǵyndarymen keri baılanys ornatý úshin WhatsApp jelisinde arnaıy chat ashtym. Sol arqyly turǵyndarmen únemi baılanys jasaımyn. Mindetim – quqyq buzýshylyq pen qylmysty boldyrmaý, aldyn alý. Osy maqsat úshin qyzmet ete beremin, – deıdi polısııa kapıtany Ǵ.Aldanbaev.Aýyl turǵyndarynyń biri Shalqarbaı Izbasarovtyń aıtýynsha, Taısoıǵan – áýelden yntymaǵy jarasqan, birligi bekem, tynyshtyqty tý etken berekeli meken. Sonyń nátıjesinde turǵyndary tatý, al aýyl ishi kúndiz de, túnde de tynysh. – Memleket basshysy Qasym-Jomart Toqaev óz Joldaýynda «Polısııa halyqqa jaqyn, ashyq bolýy kerek» dep qadap aıtty. Ásirese, ýchaskelik ınspektorlardyń mártebesin kóterýdi tapsyrdy. Osy oraıda Qyzylqoǵa aýdanynyń Taısoıǵan aýyldyq okrýgindegi ýchaskelik bekettiń jumysyn ózge aýdandar men ákimshilik aýmaqtarǵa úlgi etýdi kózdep otyrmyz. Bizdiń maqsatymyz – halyqtyń polısııaǵa senimin arttyrý. О́ıtkeni polısııa qyzmetkerleriniń jumysyna baǵany turǵyndar beredi, – deıdi oblystyq polısııa departamentiniń bastyǵy, polısııa polkovnıgi Qamza Úmbetqalıev.
Atyraý oblysy