Úkimet múddeli memlekettik organdarmen jáne uıymdarmen birlesip tiri qoıdyń eksportyna tolyq tyıym salý týraly usynysty qarady. Usynysty Qazaqstannyń qoı ósirýshiler ulttyq qaýymdastyǵynyń tóraǵasy Almasbek Sadyrbaev joldaǵan bolatyn.
Ulttyq statıstıka bıýrosynyń derekterine súıensek, jyl basynda eldegi qoıdyń basy 20,05 mln-dy quraǵan. 2020 jyldyń qorytyndysy boıynsha ósim 902 myń basqa (4,7 paıyzǵa) teń. Bul sońǵy 10 jyldaǵy eń joǵary kórsetkish. Osy jyldyń basynan beri tól esebinen qoıdyń basy 7,1 mln-ǵa ulǵaıdy. Osylaısha, 1 maýsymdaǵy derekke sáıkes Qazaqstandaǵy qoıdyń sany 27,1 mln-ǵa jetti.Jyl saıyn elimizde 172,4 myń tonna qoı eti óndiriledi. Ishki naryqty qamtamasyz etý kórsetkishi – 100,7 paıyz. Osy jyldyń tórt aıynda Birikken Arab Ámirlikterine, О́zbekstan, Bahreın jáne Reseı memleketterine 538 tonna qoı eti eksporttaldy. «Alaıda qoı sharýashylyǵy salasyndaǵy basqa qoǵamdyq uıymdar qoı eksportyna tyıym salý máselesi fermerlerdiń qarjylyq jaǵdaıyna teris áser etýi múmkin ekenin jetkizip, tyıym salýdy engizbeý jóninde óz ustanymdaryn bildirdi», dep habarlady Aýyl sharýashylyǵy mınıstrligi. Vedomstvo bıyl qurǵaq aýa raıy jaǵdaıyna baılanysty ońtústik óńirlerde azyq baǵasynyń ósýi baıqalyp otyrǵanyn alǵa tartty. Shóptiń azdyǵyna baılanysty fermerler úlken aýmaqtan jem jınaýǵa májbúr. Bul janar-jaǵarmaı shyǵyndaryn jáne jem baǵasyn arttyrady. Osylaısha, jem-shópti ýaqtyly daıyndaý jáne satyp alý maqsatynda fermerler tólderin jazǵy, kúzgi kezeńderde ótkizýge májbúr bolady. Budan bólek, pandemııaǵa baılanysty eksporttyq naryqtar tolyq qalpyna keltirilmedi. Avıatasymaldaý quny 2 ese ósti. Barlyq óńirde artyq qoı etin eksportqa shyǵarýǵa múmkindik beretin zamanaýı sertıfıkattalǵan et óńdeý kásiporyndary joq.«Fermerler mundaı qıyn jaǵdaıda tiri qoıdyń eksportyna tyıym salý olardyń qarjylyq jaǵdaıyna teris áser etedi dep sanaıdy. Satyp alý baǵasynyń tómen bolýyna baılanysty fermerlerdiń mal basyn kútip-baǵýǵa jumsaǵan shyǵyndary ótelmeıdi jáne olar mal basyn ulǵaıtýǵa múddeli bolmaıdy. Qazirgi ýaqytta Qazaqstanda aýyl sharýashylyǵy jáne qarjy mınıstrlikteriniń birlesken buıryǵyna sáıkes analyq usaq mal basyn shyǵarýǵa tyıym salynǵan», dep habarlady vedomstvo. Buǵan deıin Aýyl sharýashylyǵy mınıstrligi qoı sharýashylyǵyn damytý úshin arnaıy memlekettik kómek kórsetiletinin habarlaǵan bolatyn. Asyldandyrý jumystary, asyl tuqymdy mal basyn satyp alý, bordaqylaý alańdaryna nemese etti qaıta óńdeý kásiporyndaryna ótkizilgen qoshqarlardyń quny, sondaı-aq sharýashylyqtarda jáne aýyl sharýashylyǵy kooperatıvterinde analyq mal basyn qoldan uryqtandyrý jónindegi qyzmetter sýbsıdııalanady.Sóıtip, taraptardyń pikirlerin eskere otyryp, vedomstvoaralyq komıssııa tiri qoıdyń eksportyna tolyq tyıym salý áli jetilip-pispegen másele degen tujyrymǵa keldi. Talqylaý qorytyndysy boıynsha Aýyl sharýashylyǵy mınıstrligine osy kúzde qoı etin óndirý jáne satý sektorynyń teńdestirilýin qamtamasyz etý maqsatynda tiri maldy eksporttaýdy kvotalaý tetigin engizý tapsyryldy.