Qurlyqtyq hokkeı lıgasynda (QHL) baq synaıtyn «Barystyń» jańa maýsymǵa daıyndyǵy asa máz bolmaı tur. Maýsymaralyq úziliste qazaqstandyq ujymnyń quramy kúsheıýdiń ornyna kún saıyn álsirep barady. Máselen, búginge deıin komandadan 15 hokkeıshi ketti. Al olardyń ornyna nebári bes oıynshy ǵana keldi. Olardyń ekeýi qaqpashy bolsa, ekeýi – qorǵaýshy, taǵy bireýi – shabýylshy.
QHL-diń kezekti maýsymynyń bastalýyna eki aı qalsa da, elordalyq ujym áli de bas bapker Iýrıı Mıhaılıspen bir ymyraǵa kele almaı jatyr. Byltyr bir jyldyq kelisimshartqa otyrǵan eki tarap áli kúnge deıin kelisimniń sozylǵanyn nemese toqtaǵanyn habarlaǵan joq. Bas bapker naqtylanbaǵan soń, «Barys» quramadan ketken oıynshylardyń ornyna laıyqty oıynshylar ala almaı otyrǵan syńaıly. Joǵaryda aıtqanymyzdaı, «Barysty» búginge deıin órge súırep kelgen 15 hokkeıshi elordalyq ujymnan ketti. Ázirge astanalyq klýbpen sońǵy bolyp qorǵaýshy Leonıd Metalnıkov qoshtasty. Ol aldaǵy maýsymnan bastap Vladıvostoktyń «Admıral» klýbynyń namysyn qorǵaıdy. О́skemen hokkeı mektebiniń túlegi Metalnıkov «Barys» sapynda 2015 jyldan beri óner kórsetip keledi. Alty jylda ol QHL-da 95 match ótkizip, 16 (1+15) upaı jınaǵan. Sondaı-aq Leonıd ár jyldary «Kazsınk-Torpedo» (О́skemen), «Iýjnyı Ýral» (Orsk) jáne «Saryarqa» (Qaraǵandy) klýbtarynda oınap, 2018/19 maýsymda Joǵary hokkeı lıgasynyń (JHL) chempıony atandy. Petrov kýbogyn ıelengen tusta jyldyń úzdik qorǵaýshysy degen ataqqa ıe boldy. «Admıral» byltyrǵy maýsymda pandemııaǵa baılanysty QHL oıyndaryna qatysqan joq. Sonymen qatar munyń aldynda «Barys» sapynan Qazaqstan ulttyq quramasynyń qorǵaýshysy Valerıı Orehov ta ketip, fınlıandııalyq klýbqa aýysqan. Tipti 22 maýsymda fınlıandııalyq HPK klýby Orehovtyń resmı túrde komanda sapyna aýysqanyn jarııalap, oıynshyny dúıim jurtqa tanystyrdy. 21 jastaǵy hokkeıshiniń bir jyldyq kelisimshartqa qol qoıǵany týraly da habar taratty. Osy aqparattan keıin «Barys» Orehovtyń mansabyn Fınlıandııa chempıonatynda jalǵastyratynyn rastady. Alaıda elordalyq klýb birer kún ótken soń óz oıynshysynyń basqa klýbqa aýysýy týraly aqparatty joqqa shyǵaryp, qorǵaýshy aldaǵy maýsymda «Barysta» oınaıtynyn málimdedi. QHL-dyń byltyrǵy maýsymynda Orehov 32 match ótkizip, 10 (2 + 8) upaı jınady jáne bir pleı-off oıynynda nátıjeli pas bergen. Jalpy jazǵy úziliste «Barystan» ketken sońǵy oıynshy Metalnıkov bolady degen úmittemiz. Qazirgi tańda elordalyq klýbta bes-aq qorǵaýshy qaldy. Olar – Darren Dıs, Samat Danııar, Egor Shalapov, Olle Alsıng jáne Erıek Martınsson. Búkil maýsym boıy osy bes qorǵaýshy oınamaıtyny belgili. Endi «Barys» kem degende taǵy da bes qorǵaýshymen quramyn kúsheıtýi kerek. Sheber shabýylshylar da kerek-aq.