Búgin Parlament palatalarynyń birlesken otyrysy ótip, onda jetinshi saılanǵan Parlamenttiń birinshi sessııasy resmı túrde jabyldy, dep habarlaıdy Egemen.kz.
Atap aıtqanda, depýtattar bıylǵy 1 qyrkúıekke deıin parlamenttik kanıkýl dep jarııalanatyny týraly arnaıy qaýly qabyldady.
«Búgin biz jetinshi shaqyrylǵan parlamenttiń alǵashqy sessııasyn aıaqtap otyrmyz. Bul sessııa jumysy qasıetti Otanymyz Qazaqstanymyzǵa 30 jyl tolǵan mereıli kezeńde bastaldy. Ata-babamyz ańsaǵan Táýelsizdik árbir otbasyn, árbir qazaqstandyqtyń zor maqtanyshy jáne baǵa jetpes baılyǵy bolyp sanalady. Sebebi dál osy 30 jyldyń ishinde bizdiń elimiz barlyq salada zor tabystarǵa jetti. Búgingi kúni Qazaqstanymyz búkil álem moıyndaǵan bedeli joǵary, irgesi berik qýatty memleketke aınaldy», dedi Májilis Tóraǵasy Nurlan Nyǵmatýlın.
Osy oraıda ol Táýelsizdik jyldaryndaǵy QR Tuńǵysh Prezıdent Nursultan Nazarbaevtyń eńbegine toqtaldy.
«Búginde osy 30 jyl buryn negizin qalaǵan, maqsaty aıqyn, bolashaǵy zor «Qazaqstandyq joldy» Memleket basshysy Qasym-Jomart Kemeluly Toqaev odan ári tabysty jalǵastyryp keledi. Qazirdiń ózinde el damýyna naqty serpin beretin mańyzdy bastamalar, birqatar saıası ári ekonomıkalyq-áleýmettik reformalar nátıjeli qolǵa alyndy. Onyń barlyǵyn zań jaǵynan qamtamasyz etip kele jatqan qos palataly kásibı Parlamenttiń qurylǵanyna da bıyl 25 tolyp otyr. Bul árqashanda Qazaqstannyń zańnamalyq tiregi bolyp kele jatqan Parlament úshin óte mańyzdy oqıǵa. Osyndaı tarıhı kezeńde bizdiń depýtattyq korpýstyń róli de, jaýapkershiligi de burynǵydan da arta tústi», dedi Májilis Tóraǵasy.