Shveısarııanyń iskerlik toptar ókilderimen ótken kezdesýden keıin Memleket basshysy birqatar kompanııanyń jetekshilerimen jeke-jeke kezdesý ótkizdi, dep habarlaıdy Egemen.kz Aqordanyń resmı saıtyna silteme jasap.
Stadler Rail AG holdıngi dırektorlar keńesiniń tóraǵasy Peter Shpýlermenótken kezdesýde kólik salasyndaǵy ınvestısııalyq jobalardy júzege asyrýdyń perspektıvalary, sondaı-aq, Qazaqstan-Shveısarııa iskerlik keńesiniń kezekti otyrysyn ótkizýge baılanysty máseleler talqylandy.
Glencore International AG kompanııasynyń bas dırektory Aıvan Glazenberg Qasym-Jomart Toqaevqa «Qazmyrysh» JShS-in odan ári damytý jónindegi kompanııanyń josparlary, sonyń ishinde, Jáırem ken baıytý kombınatyndaǵy polımetall rýdalaryn óńdeıtin zaýyttyń qurylysy týraly málimet berdi.
Memleket basshysy Shyǵys Qazaqstan oblysyndaǵy ekologııalyq ahýaldy jaqsartý úshin ozyq tehnologııalardy engizýdiń mańyzdy ekenin aıtty.
Qasym-Jomart Toqaev jaqyn arada qyzmetinen ketetin Aıvan Glazenbergke Qazaqstannyń taý-ken salasyn damytýǵa qosqan úlesi úshin rızashylyǵyn bildirdi jáne kezdesýge qatysyp otyrǵan Gerı Neıglge tabys tiledi. Gerı Neıgl Aıvan Glazenbergtiń ornyna kompanııany basqarady.
F.Hoffmann-La Roche AG farmasevtıkalyq kompanııasynyń basqarma tóraǵasy Krıstof Franspenkezdesý kezinde birlesken jobalardy júzege asyrý múmkindikteri, sonyń ishinde, COVID-19 indetin jáne basqa da ártúrli aýrýlardy zertteý jónindegi ǵylymı-zertteý laboratorııasyn ashý máselesi sóz boldy.