Jýyrda Birikken Arab Ámirlikteriniń (BAÁ) Dýbaı qalasynda ótken Azııa chempıonatynda jeńis tuǵyryna kóterilgen bylǵary qolǵap sheberleri aqshalaı syılyqqa ıe boldy.
Qazaqstannyń áıelder quramasy Parsy shyǵanaǵyndaǵy jarysta keremet kórsetkishke qol jetkizip, segiz birdeı sulýymyz altynnan alqa taqqan edi. Elge oralǵannan keıin olardyń eńbegi elenip, chempıondyq ataqqa qol jetkizgen ár burymdyǵa 10 myń AQSh dollarynan berildi. Áıelder men erlerdi qosa alǵanda jerlesterimiz barlyǵy 16 (8 altyn+6 kúmis+2 qola) júldeni qorjynǵa saldy. Qazaqstan boks federasııasynyń prezıdenti Keńes Raqyshevtiń qatysýmen Almatyda ótken aıtýly is-shara barysynda kúmispen kúptelgenderge 5 myń jáne qola medaldi moıyndaryna ilgenderge 2,5 myń dollar mólsherinde qarjy sertıfıkaty tapsyryldy. Sonymen qatar ulttyq qurama bapkerleri, boksshylardyń jeke jattyqtyrýshylary, keshendi-ǵylymı top músheleri de aqshalaı jáne basqa da baǵaly syılyqtardan qur qalǵan joq. – Tarıhı jeńiske qol jetkizgen qyzdarymyzdy Memleket basshysynyń ózi quttyqtaǵanyn jaqsy bilesizder. Prezıdenttiń quttyqtaýy – biz úshin asa qundy. Sebebi osy kúnge deıin birde-bir memlekettiń áıelder quramasy dál bizderdeı tolaǵaı tabysqa qol jetkizgen emes. Sondyqtan da komandamyzdyń osy jarqyn jeńisi bizdi qatty marqaıtyp otyr. Alda Olımpııa oıyndary «menmundalap» tur. Qazaqstannyń bylǵary qolǵap sheberleri Tokıodaǵy dodada da joǵary deńgeıde óner kórsetedi dep úmittenemiz, – dedi Keńes Raqyshev.