О́tken táýlikte elordada koronavırýsty juqtyrýdyń 800-den astam jaǵdaıy tirkeldi. Nur-Sultandaǵy epıdemıologııalyq jaǵdaıdyń kúrt nasharlaýy sebepti karantın taǵy da kúsheıtiledi, dep habarlaıdy Egemen.kz.
Karantındik talaptardyń saqtalýyn anyqtaıtyn monıtorıngtik toptardyń jumysy kúsheıtilip, táýlik boıǵy rejımge aýystyryldy.
Eger meıramhanalarda/kafelerde jáne basqa da mekemelerde is-sharalar ótkizilse, ol nysannyń jumysy toqtatylatyn bolady.
Sonymen qatar, 4 shildeden bastap «Ashyq» jobasy boıynsha jumys isteıtin tamaqtaný oryndarynyń (meıramhanalar, kafeler) ýaqyty 02:00-den 22:00-ge deıin (jabyq jerlerde), al syrtta, ıaǵnı esik aldynda jumys isteıtin tamaqtaný oryndarynyń ýaqyty 02:00-den 00:00-ge deıin qysqarady.
Sondaı-aq, jeksenbi kúnderi qoǵamdyq kóliktiń jumysy toqtatylady. Bul kúni avtobýstar dezınfeksııalanady.
«Ashyq» jobasyn qoldanbaıtyn fıtnes-ortalyqtardyń (ıoga ortalyqtary, t.b.) jumysy aptanyń barlyq kúninde de toqtatylady. Al Ashyq jobasy boıynsha isteıtin fıtnes-ortalyqtar (ıoga ortalyqtary, t.b.) dúısenbi-juma kúnderi jumys istese, demalys kúnderi toqtatylady.
Qalada qatań karantındik sharalardy engizbes úshin ujymdyq ımmýnıtetti damytý qajet. Al ujymdyq ımmýnıtettiń úlesi 60%-dan asýy tıis. Qazir qalada vaksınanyń birinshi komponentin 229 myńnan astam adam aldy. Medısına qyzmetkerleriniń 90%-dan astamy, al kommýnaldyq qyzmetkerlerdiń 70%-dan astamy koronavırýsqa qarsy egildi.
Vaksınasııa ǵana óz densaýlyǵyńyzdy, jaqyndaryńyz ben aınalańyzdaǵy jurttyń densaýlyǵyn qorǵaýǵa múmkindik beredi.
Esterińizge sala keteıik, 2 shildeden bastap qalanyń bas memlekettik sanıtarlyq dárigeri Sarhat Beısenovanyń elorda kúnine arnalǵan buqaralyq is-sharalarǵa tyıym salý týraly qaýlysy kúshine enedi. Jabyq mekemelerdegi is-sharalardyń bárine tyıym salynady (Ashyq jobasynyń tártibi boıynsha teatrlardyń 20%-dan aspaıtyn tolýyn esepke almaǵanda).
Sondaı-aq saıabaq aýmaǵynda ornalasqan ashyq aýadaǵy attraksıondardyń barlyq túriniń jumysyna tyıym salynady.