QazMÚBB ýnıversıteti óz qyzmetin toqtatty. Qazaq medısınalyq úzdiksiz bilim berý ýnıversıtetiniń barlyq stýdenti basqa medısınalyq joǵary oqý oryndaryna aýystyryldy, dep habarlaıdy Egemen.kz Bilim jáne ǵylym mınıstrligine silteme jasap.
Vedomstvo baspasóz qyzmetiniń málimetinshe, aýystyrý sońǵy eki aıda júzege asyryldy. Endi túlekter oqýyn jalǵastyryp, joǵary bilim týraly dıplom alady. Esterińizge sala keteıik, osy jyldyń sáýir aıynda Qazaq medısınalyq úzdiksiz bilim berý ýnıversıtetin bas lısenzııasynan aıyrý týraly sot sheshimi zańdy kúshine engen.
«QazMÚBBÝ-da 3 500-ge jýyq adam bilim aldy. Stýdentterdiń basym bóligi Almaty qalasynyń medısınalyq joǵary oqý oryndaryna aýysty. Keıbir stýdentter oqýyn Nur-Sultan, Qaraǵandy, Semeı, Aqtóbe, Shymkent jáne Túrkistan qalalaryndaǵy medısınalyq JOO-larda jalǵastyrdy. Aýysý barysynda qabyldaýshy joǵary oqý oryndaryna stýdentterdi qabyldaý jáne oqý nátıjelerin baǵalaý kezinde QazMÚBBÝ tarapynan jiberilgen buzýshylyqtardy joıýǵa týra keldi. Aýystyrylǵan 111 stýdenttiń jeke qujattarynda talap etiletin attestattar men olarǵa qosymshalar bolmady. Keıbir stýdentterdiń UBT-daǵy sertıfıkattary da bolǵan joq», dedi QR BǴM Bilim jáne ǵylym salasyndaǵy sapany qamtamasyz etý komıteti tóraǵasynyń orynbasary Gúljan Jarasova.
Sondaı-aq stýdentterdi basqa joǵary oqý oryndaryna aýystyrý kezinde keıbir magıstranttardyń prerekvızıtterden ótpeı oqyǵany anyqtaldy. Sonymen qatar stýdentter qabyldaý kezinde mindetti testileýdiń keıbir elementterin tapsyrmaǵan.
QazMÚBBÝ bitirýshi kýrs stýdentteri memlekettik standarttyń mindetti pánderin tolyq kólemde oqymaǵan. Birqatar negizgi pánder múldem ıgerilmegen. Máselen, «Farmasııa» qysqartylǵan baǵdarlamasy boıynsha oqyǵan stýdentter tıisti 120 kredıttiń ornyna tek 78-in ǵana oqyǵan. «QazMÚBBÝ jibergen osy jáne basqa da buzýshylyqtar stýdentterdi basqa medısınalyq joǵary oqý oryndaryna aýystyrý prosesin tejedi. Búgingi tańda bul máseleler sheshilip, bilim alýshylar basqa ýnıversıtetterde oqýyn jalǵastyrdy. Qabyldaýshy joǵary oqý oryndary bilim alýshylarǵa akademııalyq aıyrmashylyqty ıgerýge múmkindik berdi. Sondaı-aq olar stýdentterge jetispeıtin qujattardy qalpyna keltirýge, oqýdaǵy olqylyqtardyń ornyn toltyrýǵa jáne bıylǵy oqý jylyn ýaqytyly aıaqtaýǵa kómektesedi», dedi Gúljan Jarasova.