UBT-ǵa tyıym salynǵan zattardy kirgizý áreketteri men UBT erejelerin buzý sany birshama azaıdy, dep habarlaıdy Egemen.kz.
Máselen, ótken jyly 1296 túlek UBT-ǵa tyıym salynǵan zattardy alyp ótýge tyryssa, bıyl mundaı 756 jaǵdaı tirkeldi. Bul ótken jyly ereje buzýǵa tyrysqan qatysýshylardy testileýge jibermeý týraly normanyń engizilýi men árbir testilenýshi úshin beınebaqylaý kameralaryn ornatýmen baılanysty.
«Sonymen qatar testileý kezinde erejelerdi buzǵany úshin 1305 adam aýdıtorııadan shyǵarylyp, nátıjeleri joıyldy. Sonymen birge biz barlyq beınejazbaǵa taldaý jasaımyz. Bul úshin taǵy eki aı bar. Eger tyıym salynǵan zattardy paıdalaný faktileri anyqtalsa, talapker bilim berý grantynan aıyrylady. О́tken jyly biz bul normany alǵash ret qoldanyp, 100-den astam túlek granttan aıyryldy. UBT-ǵa daıyndyq jáne tapsyrý barysynda biz talapkerlerdi birneshe ret akademııalyq adaldyqqa shaqyrdyq. Bul olarǵa bolashaqta jaqsy maman bolýǵa múmkindik beredi. Álemdik tájirıbe kórsetip otyrǵandaı, ereje buzýshylarǵa qatysty odan da qatań sharalar qoldanylady. О́ıtkeni bolashaqta mundaı mamandar halyqty emdep, balalarymyzǵa bilim beredi», dep málimdedi OKQ brıfınginde QR BǴM Ulttyq testileý ortalyǵy dırektorynyń m.a. Naýjan Dıdarbekova.
О́tken jyly beınejazbalar boıynsha taldaý júrgizilip, 152 testilenýshiniń, onyń ishinde 100 grant ıegeriniń nátıjesi joıyldy. Anyqtalǵan buzýshylyqtar saldarynan bul stýdentter joo-da oqý múmkindiginen aıyryldy. Bıyl UBT tapsyrý pýnktterinde alǵash ret úsh satyly tulǵany anyqtaý júıesi engizildi. Test tapsyrýshylar jeke kýáligin usynyp, Face-ID júıesi arqyly tekserildi. Sondaı-aq árbir testilenýshiniń aldynda kamera ornatyldy. Osy sharalardyń barlyǵy testileýdi tapsyrý rásiminiń ashyqtyǵyn qamtamasyz etti.
«Test tapsyrýǵa óz ornyna bógde adamdardy kirgizýge tyrysqandar da boldy. Eger ótken jyly osyndaı 7 fakti anyqtalsa, bıyl Face-ID júıesi men baqylaýdy kúsheıtýdiń nátıjesinde 18 jaǵdaı anyqtaldy. Máselen, 4 talapkerdiń ornyna testileýge elordalyq eki joǵary oqý ornynyń 4 stýdenti qatyspaq bolǵan. Bul úshin tipti jalǵan qujattar jasatqan. Testilenýshiler men testileýge kirýge talpynǵan bógde tulǵalar boıynsha barlyq derek quqyq qorǵaý organdaryna jiberildi. Olarǵa qatysty qylmystyq is qozǵaldy», dedi Naýjan Dıdarbekova.
Testileý barysynda keıbir talapkerlerden jasyryn kameralar, shaǵyn qulaqqaptar, smartfondar jáne basqa da tyıym salynǵan zattar tárkilendi. UBT-2021 qaýipsizdik sharalary men karantın talaptaryn saqtaı otyryp, qalypty rejımde ótti. Bilim berý granttaryn taǵaıyndaýdyń sońǵy nátıjeleri tamyz aıynda belgili bolady.