Qazaqpen birge san ǵasyrdan beri joǵalmaǵan ulttyq aspaptyń biri – dombyra. Qazir oblystyq tarıhı ólketaný mýzeıiniń qorynda 88 dombyra saqtaýly tur. Onyń ishinde 1975 jyly qabyldanǵan kúmispen jáne súıekpen áshekeılenip, batysqazaqstandyq úlgide jasalǵan dombyra da bar.
Mýzeı dırektory Rashıda Harıpovanyń aıtýynsha, dombyralar kolleksııasy Elbasynyń «Mádenı mura» baǵdarlamasy aıasynda qolǵa alynǵan. Sodan beri 40 óner ıesiniń dombyrasy jınalypty. Munda Mahambet pen Abaı shertken dombyralardyń kóshirmesi, Dınanyń, Nurǵısa men Qarshyǵanyń, Rysbaı men Ázıdollanyń qos ishekten qońyr úndi tógilter aspaby tarıhı jádigerge aınalǵan. Atyraýda artyna mol shyǵarmashylyq mura qaldyrǵan qazaq óneriniń qaıtalanbas sańlaqtary, kúı atasy atanǵan Qurmanǵazy Saǵyrbaıulyna, kúı anasy – Dına Nurpeıisova men Memlekettik syılyqtyń laýreaty Qarshyǵa Ahmedııarovtyń eńseli eskertkishteri boı kótergen edi. Ulttyq dombyra kúnine oraı óńirdiń zııaly qaýym ókilderi uly kúıshi Qurmanǵazy Saǵyrbaıulynyń eskertkishine gúl shoǵyn qoıdy. – Alash jurty Atyraýdy ejelden kúı eli, kúıdiń Otany dep biledi. Ǵasyrdan-ǵasyrǵa jetken batystyń kúıshilik óneri tarıhynyń tamyry tereńde jatyr. Kıeli topyraqtan Qurmanǵazy, Dáýletkereı, Dına, Esbaı men Balamaısan, Qarshyǵa men Rysbaı, Ázıdolla aǵalarymyz ben qazaq kúıiniń qazirgi maqtanyshy Aıgúl Úlkenbaeva túlep ushqan. Sondyqtan Atyraýdyń kúıshilik ónerin ulttyq mádenıettiń kúretamyrynyń biri retinde aıtýǵa tolyq negiz bar, – dedi oblys ákimi Mahambet Dosmuhambetov. Ákimniń aıtýynsha, qazaqpen birge egiz uǵymǵa aınalǵan dombyra – ulttyq brendtiń biri. – О́ıtkeni dombyra – ulttyń úni men jany ǵana emes, myńdaǵan jyldar boıy halqymyzben birge jasap kele jatqan qasterli qasıeti. Baǵzy babalardan jetken basty baılyǵymyz. Sondyqtan dombyrasyz ult mádenıeti tarıhyn kóz aldymyzǵa elestetý múmkin emes, – dedi oblys ákimi.«Naryn» halyq aspaptar orkestri ashyq aspan astyndaǵy alańda Qurmanǵazy Saǵyrbaıulynyń «Serper», «Balbyraýyn» jáne basqa da birneshe kúıin oryndady.
Atyraý oblysy