«Egemen Qazaqstan» kitaphanasy» serııasymen «El jáne Elbasy» jınaǵy jaryq kórdi. Kitapta keıingi eki jylda «Egemen Qazaqstan» gazetinde jarııalanǵan elimizdiń Tuńǵysh Prezıdenti – Elbasy Nursultan Nazarbaevtyń memleket qalyptastyrýshy retindegi tulǵalyq, qaıratkerlik qyrlaryn keńinen ashyp kórsetetin, táýelsizdik tarıhynan syr shertetin maqalalar men estelikter toptastyrylǵan.
Maqala avtorlary – Elbasynyń táýelsiz memlekettiń irgesin qalyptastyrýǵa atsalysqan úzeńgilesteri, memleket jáne qoǵam qaıratkerleri. Sondaı-aq avtorlar arasynda sheteldik memleket jáne qoǵam qaıratkerleri, jýrnalıster men sarapshylar da bar. Aqparat jáne qoǵamdyq damý mınıstri Aıda Balaeva jınaqqa jazǵan alǵysózinde elimizdiń otyz jyldaǵy jetistikterine toqtalyp, onyń bári «jas qazaq memleketiniń arhıtektory, Qazaqstannyń Tuńǵysh Prezıdenti – Elbasy Nursultan Ábishuly Nazarbaevtyń eren eńbeginiń, jahandyq aýqymdaǵy qaıratkerlik qyzmetiniń máýeli jemisi» ekenin atap ótti. «Eń bastysy – osy kitap arqyly eldik murat jolynda búkil qyzmettik ǵumyryn arnap, qanshama ǵasyr tarıhqa esesi ketken bodan elden álemge aty tanylǵan azat el, myqty memleket jasaǵan Tuńǵysh Prezıdentimiz jaıly adamgershilik pen aqıqatqa qurylǵan jyly estelikter jınaǵyn urpaqtar jadyna amanat etý», dedi mınıstr. Kitap «Azattyq arhıtektory», «Eldiktiń eńsesin tiktegen», «Elbasy jáne elorda», «Sarabdal saıasatker» atty tórt bólimnen turady.