Keshe, elimiz aýmaǵyndaǵy joldarda ártúrli jaǵdaılarmen qalyp qoıǵan 120 jolaýshyǵa kómek kórsetildi. Bul týraly «Habar» telearnasy habarlady.
Aqmola oblystyq tótenshe jaǵdaılar departamentiniń málimetine júginsek, «Astana-Shiderti» baǵytyndaǵy tas joldyń 118-shi shaqyrymynda avtobýs buzylyp, qutqarýshylar 50 jolaýshyny dittegen jerine jetkizgen. Pavlodarǵa qaraı jolǵa shyqqan ekinshi kólik te «Astana-Pavlodar» trassasynda toqtap qalǵan eken. Onyń ishindegi 30 jolaýshyǵa da kómek kórsetildi.
Shyǵys Qazaqstan oblysynyń Zaısan qalasynan Astanaǵa qaraı bet alǵan úshinshi avtobýs Aqmola oblysynyń Selınograd aýdany mańynda qatty aıazǵa shydas bermeı, jarty jolda buzylyp qalǵan. Alaıda, osy avtobýsta bolǵan 40 jolaýshyǵa basqa kólik bólindi.
Tótenshe jaǵdaılar mınıstrliginiń málimeti boıynsha, ótken senbi kúni el aýmaǵyndaǵy joldarda buzylyp, dalada qalyp qoıǵan kólikterden 177 adam qutqarylǵan. Al «Qazgıdromet» mamandary respýblıka kóleminde qatty aıaz búgin de bolatynyn eskertedi.
Baqytbek Keneshuly.
Derekkóz: «Habar» telearnasy
Foto: Sky 24. ru.