«Nur Otan» partııasy janyndaǵy Bilim men ǵylymdy damytý jónindegi respýblıkalyq qoǵamdyq keńestiń otyrysynda jańa oqý jylyn uıymdastyrýdyń ózekti máseleleri talqylandy, dep habarlaıdy Egemen.kz.
Keńes tóraǵasy, Parlament Májilisiniń depýtaty Juldyz Súleımenova búginde bilim berý salasyndaǵy basym mindetterdiń biri – oflaın oqýǵa oralý ekenin atap ótti. Ol úshin barlyq sanıtarlyq-epıdemıologııalyq talap qatań saqtalýy kerek.
Bas memlekettik sanıtarlyq dáriger Erlan Qııasov mektepter dástúrli oqytý formatyna kóshýi úshin pedagogter men qyzmetkerler 100% vaksınalaýmen qamtamasyz etitlýi kerek ekenin aıtty.
«Mektepterdegi saqtyq sharalary buqaralyq is-sharalardy ótkizýge tyıym salýdy, synyptardy bólýdi jáne ártúrli synyptar úshin úzilis ýaqytyn bólýdi, ashanada tamaqtaný barysyna baqylaýdy kúsheıtýdi qamtıdy. Joǵary oqý oryndaryna kelsek, 18 jastan asqan stýdentter de vaksınalanýy nemese qashyqtan oqytýǵa aýystyrylýy tıis», dedi E.Qııasov.
Keńes múshesi, «Respýblıkalyq fızıka-matematıka mektebi» KEAQ basqarma tóraǵasy Ǵabıt Bekahmetov oqýshylardy bastaýysh, orta jáne joǵary mektep bloktaryna bólýdi usyndy. Koronavırýs anyqtalǵan jaǵdaıda, karantınge búkil mektep emes, naqty blok jabylady.
«Bilim berý mekemeleriniń basshylaryna oqýshylardy fızıkalyq túrde bólýge qatysty naqty usynystar berý qajet. Máselen, olardyń úziliske shyǵatyn ýaqyty ǵana emes, ár blokta sabaq bastalatyn jáne aıaqtalatyn ýaqyt ta ártúrli bolǵany jón», dedi ol.
Keńes múshesi, Almaty memlekettik energetıka jáne elektrondyq tehnologııalar kolledjiniń dırektory Tóleýǵalı Taıtýleev qoǵamdyq kólikterde baqylaýdy kúsheıtý qajet dep sanaıdy. Onyń aıtýynsha, oqýshylar men pedagogterdiń vırýs juqtyrý qaýpi naq osy qoǵamdyq kólikterde joǵary.
Bilim jáne ǵylym vıse-mınıstri Sholpan Karınova óz kezeginde 1 qyrkúıekten bastap elimizde 7 475 mektepti ashý josparlanyp otyrǵanyn jetkizdi. Sondaı-aq «Nur Otan» partııasynyń saılaýaldy baǵdarlamasyn oryndaýǵa arnalǵan Jol kartasy aıasynda bıyl 200 mektep salý jáne 1000 mektepti jańartý mindeti turǵanyn atap ótti.
«289 mekemege kúrdeli jóndeý júrgizý, birqatar mektepterde jıhazdardy jańartý, jańa pándik synyptardy ashý, kitaphanalar men ashanalardy jańǵyrtý josparlanǵan», dedi Sh.Karınova.
Otyrys sońynda oqýshylardyń uzaq ýaqyt onlaın formatta oqýyna baılanysty oryn alǵan olqylyqtardy taldaý jáne olardyń ornyn toltyrý úshin keshendi baǵdarlama qabyldaýǵa qatysty Bilim jáne ǵylym mınıstrligine birqatar usynym ázirlendi. Keńes músheleri pedagog tapshylyǵyn tehnıkalyq mamandardy tartý arqyly sheshýdi usyndy.