Jaýyngerlik týmen qoshtasýdyń saltanatty rásimi «Ońtústik» óńirlik qolbasshylyǵynyń mehanıkalandyrylǵan brıgadasynda ótti. Bul kúni áskerı qyzmettiń belgilengen merzimin ótegen 130-ǵa jýyq áskerı qyzmetshi 365 kún ómir súrgen áskerı bólimmen qoshtasty, dep jazady Egemen.kz.
Sarbazadardy qyzmetteriniń aıaqtalýymen mehanıkalandyrylǵan brıgada komandıri podpolkovnık Núrken Qaraǵulov quttyqtady. Bólim basshylyǵy, ofıserler jáne kelisimshart boıynsha áskerı qyzmetshiler atynan ol áskerı qyzmetshilerdiń joǵary rýhanı–adamgershilik jáne patrıottyq qasıetterin qalyptastyrǵanyna senim bildirdi.
- Sizderdiń árqaısylaryńyz kez kelgen ýaqytta Otandy qorǵaýǵa daıyn ekenderińe senimdimin. Men áskerı ómirin aıaqtap jatqan barlyq sarbazdarǵa, bir jyl boıy olarmen birge bolǵan barlyq ofıserler men serjanttarǵa alǵysymdy bildirgim keledi. Ata - analaryńyzǵa naǵyz Otan qorǵaýshylardy tárbıelegeni úshin rızashylyǵymdy bildiremin, - dep atap ótti podpolkovnık Núrken Qaraǵulov.
«Qarýly Kúshter Ardagerleri» RQB qalalyq fılıalynyń tóraǵasy polkovnık Serikbaı Onbaev sarbazdarǵa aldaǵy ýaqytta tańdaǵan salalyrndasáttilik tiledi.
- Sarbazdar sizderge aldaǵy ómirde óz qabiletterińizdi durys qoldana otyryp, týystaryńyz ben jaqyndaryńyz úshin naǵyz tirek bolasyz dep senemin. Sizder Otanymyzdyń gúldenýi úshin qoldaryńyzdan kelgeninshe eńbektenetinderińizge senim artamyn, - dedi ardager.
Úlgili áskerı tártip, jaýyngerlik daıarlyq pen qyzmet etýde kórsetken jaqsy nátıjeleri úshin sarbazdar alǵys hattarmen jáne gramotalarmen marapattaldy.