Bıylǵy jyl sońyna deıin Aqtóbe men Atyraý oblystaryn baılanystyratyn respýblıkalyq mańyzy bar «Qandyaǵash-Maqat» avtomobıl jolyn rekonstrýksııalaýdy aıaqtaý josparlanyp otyr, dep jazady Egemen.kz.
Indýstrııa jáne ınfraqurylymdyq damý mınıstrliginiń baspasóz qyzmetinen málim etkendeı, atalǵan jol ótken ǵasyrdyń 60-jyldarynda salynǵan. Eli jyldan astam ýaqyt boıy munda tek aǵymdaǵy jóndeý jumystary júrgizilgen. Sondyqtan sońǵy ýaqytta avtokólik júrgizýshileri tas jol boıyndaǵy aýyl arasyndaǵy joldarmen júrýge májbúr boldy.
«Rekonstrýksııa jobasy jalpy uzyndyǵy 304 shaqyrymdyqjeti ýchaskeni, sondaı-aq temirjol arqyly 11 kópir men eki jol ótkelin salýdy qamtıdy. Bul jumys bastalǵanǵa deıin Qandyaǵashtan Maqat aýylyna deıingi jol ýaqyty kem degende 11-12 saǵatty, al Atyraý qalasyna deıin 14 saǵatty quraǵan edi. Jańǵyrtý jumystary aıaqtalǵannan keıin Qandyaǵashtan Maqatqa deıingi júrý ýaqyty shamamen 4 saǵatty, al Atyraýǵa deıin 6 saǵatty quraıtyn bolady» dep málim etti baspasóz qyzmetinen.
Jol qurylysynyń bas merdigerleri – «Todını», «Shanhaı Konstrakshn», «Akkord» BK/«Aq jol qurylys» jáne «Ant Inshaat» kompanııalary. Bıyl bul kompanııalar 1 353 myń tonna asfaltbeton tóseýi qajet. Búginge deıin onyń 1008 myń tonna tóseldi.
«Jobany iske asyrýǵa shamamen 1000 adam men 680-nen astam tehnıkanyń jumyldyrylǵan. Budan bólek, joba aıasynda Atyraý oblysy, Maqat aýdanynyń Dossor aýylyna aınalma jol salynýda. Bul Dossor turǵyndary úshin qaýipsiz jaǵdaı jasaıdy» dep habarlady baspasóz qyzmeti.
Atalǵan jobany iske asyrý jol boıyndaǵy qyzmet kórsetý nysandaryn damytýǵa, demalys oryndaryn uıymdastyrý arqyly jergilikti turǵyndardyń kásipkerlik qyzmetke bet burýyna oń áser etedi.