UQK Shekara qyzmeti Almaty oblysy boıynsha departamentiniń Qarasaı aýdany boıynsha shekara basqarmasyna qarasty «Saty» shekara bólimshesiniń aýmaǵynda qyzyl kitapqa engen ósimdikti zańsyz jınaǵan azamattar qolǵa tústi, dep habarlaıdy Egemen.kz.
Sondaı-aq shekara narıady ósimdiktermen birge úsh dana ulardy taýyp tárkiledi.
«Qos oqıǵa da 8 shilde kúni oryn alǵan. Aldyn ala kelip túsken aqparatqa saı áreket etken shekarashylar túngi saǵat 12:40 shamasynda Jalańash-Alǵabas tasjolynyń boıynda Qazaqstan Respýblıkasynyń qos azamaty mingen kólikti toqtatqan. Jeńil kólikti tintý nátıjesinde ishine belgisiz ósimdikter salynǵan 30 qapshyq tabylyp, tárkilendi. Salmaǵy shamamen 300 kelini tartady. Keıinnen belgili bolǵandaı, bul – elimizdiń qyzyl kitabyna engen «Makratonı krasıachaıa» dep atalatyn ósimdik bolyp shyqty», deıdi UQK Shekara qyzmetiniń zapastaǵy podpolkovnıgi Tamara Dáýletbaeva.
Sonymen qatar kólikten úsh ular tabylǵan. Olar ózderiniń zańsyz áreketterin «Saty» shekara bólimshesiniń ýchaskesindegi memlekettik shekaradan 20 shaqyrym jerdegi Dalashyq dep atalatyn aýmaqta iske asyrǵan. Qolǵa túskenderdiń biri shekarashylarǵa qarsylyq tanytyp, qashýǵa tyrysqan.
«Dál sol kúni keshki altylardyń kezinde shekara narıady «Kólsaı kólderi» memlekettik ulttyq saıabaǵynyń qyzmetkerlerimen birlesip, Jińishke shatqalynyń boıynan tórt azamatty ustady. Shekarashylarǵa ózderiniń jeke bastaryn kýálandyratyn qujattaryn kórsete almaǵan azamattardyń kóliginen de qyzyl kitapqa engen ósimdiktiń túri salynǵan bes qapshyq tabylyp, tárkilendi», deıdi Tamara Dáýletbaeva.
Qazirgi sátte shekara aımaǵynda quryqtalǵan azamattar «Jalańash» shekara bólimshesine jetkizilip, tekserý jumystary bastaldy.