Shymkent qalasyndaǵy «Orda» ýnıversıteti men «Mıras» ýnıversıteti bas lısenzııasynan aıyryldy. Bul týraly QR BǴM baspasóz qyzmeti habarlady, dep jazady Egemen.kz.
2020 jyly «Orda» jáne «Mıras» ýnıversıtetterin tekserý barysynda bilim berý salasyndaǵy zańnamany óreskel buzýshylyqtar anyqtaldy. Eki joǵary oqý ornynyń qyzmeti toqtatylyp, olarǵa anyqtalǵan kemshilikterdi joıýǵa ýaqyt berildi. Alaıda joǵary oqý oryndary olarmen jumys júrgizbeı, 8 aı Komıtettiń lısenzııany toqtata turý týraly sheshimine shaǵymdanǵan. Sońynda sot Komıtettiń sheshimin óz kúshinde qaldyrý týraly sheshim qabyldady. Al ýnıversıtettiń kóptegen shaǵymy qanaǵattandyrylmady.
Endi Shymkent qalasynyń mamandandyrylǵan aýdanaralyq ákimshilik sotynyń 2021 jylǵy 1 shildedegi sheshimimen atalǵan eki joǵary oqý orny bas lısenzııasynan aıyryldy.
«Osy jyldyń mamyr aıynda qaıta tekserý qorytyndysy boıynsha qateliktermen jumys júrgizilmegeni anyqtaldy. Eń basty másele kadrlardy daıarlaý sapasynda boldy. Mysaly, «Orda» Ýnıversıtetinde oqıtyndardyń 97%-y shekti baldan óte almady jáne oqý prosesinde alynǵan bilim men quzyretterdiń jetkilikti deńgeıin rastaı almady. Eki JOO-da kestege sáıkes jappaı sabaq ótkizbeý faktileri anyqtaldy. Aǵymdaǵy baǵalar qoıylmaǵan, bekitilgen kestege sáıkes emtıhandar ótkizilmegen, pánder tolyq kólemde oqytylmaǵan. Tıisti 5 kredıttiń ornyna tek 3 kredıt ıgerilgen. Barlyq pán oqý-ádistemelik materıaldarmen qamtamasyz etilmegen. Oqytýshylardyń bekitilgen pedagogıkalyq júktemesi men onyń naqty oryndalýy arasynda úlken aıyrmashylyq bar, ıaǵnı oqytýshyda júktemede belgili bir pán boıynsha dáris oqý josparlanýy múmkin, al is júzinde ol ony oqymaıdy», dep atap ótti QR BǴM Bilim jáne ǵylym salasyndaǵy sapany qamtamasyz etý Komıtetiniń Joǵary jáne joǵary oqý ornynan keıingi bilim berý salasyndaǵy baqylaý basqarmasynyń basshysy Elvıra Saparbekova.
Buǵan deıin Táýelsiz bilim berý sapasyn qamtamasyz etý agenttigi de osy joǵary oqý oryndaryn akkredıtteýdi toqtatty. Sondyqtan bul ýnıversıtetter túlekterge dıplom bere almaıdy. Dıplom alý jáne oqýdy aıaqtaý úshin stýdentter basqa ýnıversıtetterge aýysýy kerek. Bul joǵary jáne (nemese) joǵary oqý ornynan keıingi bilim berý uıymdary qyzmetiniń úlgilik qaǵıdalarynda kózdelgen.
QR «Bilim týraly» Zańyna sáıkes bilim berý qyzmetimen aınalysýǵa arnalǵan lısenzııadan aıyrylǵan nemese bilim berý uıymy taratylǵan kezde quryltaıshy bilim alýshylardy basqa bilim berý uıymdaryna aýystyrý úshin sharalar qabyldaıdy.