QR Parlament Májilisiniń depýtattary Baqytbek Smaǵul, Ǵalym Ámireev, Gennadıı Shıpovskıh Qazaly aýdanyna sapary kezinde Qazaly qalasy jáne Qojabaqy, Bozkól aýyldaryna arnaıy baryp, turǵyndardyń usynys-pikirlerin tyńdady, dep jazady Egemen.kz.
Qazaly qalasyndaǵy «О́rimtal» balabaqshasyn qaıta salý qajettiligi týyndap otyr. Balabaqshanyń kóne ǵımaraty 2012 jyly apattyq jaǵdaıda dep tanylǵan. Qazirgi tańda balabaqshanyń joba-smetalyq qujattary ázirlengen.
Depýtattar Qazaly qalasy men Qojabaqy, Bozkól aýyly turǵyndarymen kezdesýde jergilikti jerdegi túıtkildi máselelerdi tyńdady. Aýdandardy aralaýdaǵy negizgi maqsatyn túsindirip, qýańshylyq, Syrdarııa ózenindegi sý tapshylyǵyna baılanysty oryn alǵan jaǵdaıdy kózben kórip, turǵyndarmen tildesip sheshý joldaryn qarastyrýdy jetkizdi.
Kezdesýde turǵyndar basty másele qýańshylyq, jaıylymdyq, shabyndyq jerlerdi sýlandyrý, tórt túlik malǵa qajetti jem-shóp máselesi qıyndyq týdyryp otyrǵandyǵyn aıtty. Sonymen qatar, eki aýylǵa jańa balabaqsha qajet ekendigin jetkizdi.
Qojabaqy aýylyna baratyn jolda depýtattar «Qarlań» qalqymaly kópirin kórdi.
Aýdan ákiminiń orynbasary Ǵalymjan Erkebaı kóktem jáne qys mezgilinde halyqtyń kópirden ótýi qıyndap ketetinin jetkizdi. Sondyqtan osy aralyqtan tez arada kópir salý qajettiligi týyndap otyrǵandyǵyn aıtty. Qazirgi tańda Syrdarııa ózenindegi «Qarlań» temir beton kópiriniń joba-smetalyq qujattary daıyndalyp, saraptamadan ótkizilgen.
Qojabaqy aýylynda Májilis depýtattary «Agro – О́rken» JShS-niń egis alqabynda bolyp, dıhandarmen kezdesti. Kezdesýde sharýalar óz máselelerin aıtyp, kómek surady.
Munan keıin depýtattar Áıteke bı kentindegi kókónis saqtaý qoımasynyń jaǵdaıymen tanysty. «AgroOptServıs» JShS-niń syıymdylyǵy 500 tonnalyq kókónis saqtaý qoımasynda jemis saqtaıtyn eki bólme tońazytqyshpen qamtylǵan.
«AgroOptServıs» JShS dırektory Bekbolat Bıbalaevtyń aıtýynsha kartop pen kókónis ónimderi Reseıden, al, jemis-jıdekter Túrkistan oblysy men Shymkent qalasynan jáne Túrkııa men Polshadan tasymaldanady. Sonymen qatar, aldaǵy ýaqytta azyq-túlik taýarlarynyń túrlerin de kóbeıtpekshi.