Jýyrda birneshe atyraýlyq baspana baqytyna bólendi. Oblys ákimi Mahambet Dosmuhambetov medısına, bilim jáne mádenıet salasynyń bir top jas mamanyna qyzmettik páter kiltin tabystady.
– Pandemııa barshaǵa ońaı tımegenin bilemiz. Soǵan qaramastan, muǵalimderdiń eren eńbeginiń nátıjesinde oqýshylar úzdik nátıjelerge qol jetkizip, bilim jáne ǵylymı konkýrstarda júldeli oryndar alyp júr. Al bıyl Mahambet atyndaǵy akademııalyq qazaq drama teatrynyń ujymy halyqaralyq baıqaýlarda eki márte bas júldeni ıelendi, – deıdi aımaq basshysy Mahambet Dosmuhambetov.
Qyzmettik páterge ıe bolǵandar arasynda Atyraý qalasyndaǵy №17 mektep-lıseıinde tehnologııa páninen dáris beretin Jadyra Naýryzbaeva, oblystyq balalar aýrýhanasynyń neırohırýrgi Shodıer Arıpov, Mahambet atyndaǵy akademııalyq qazaq drama teatrynyń kórkemdik jetekshisi Muqanǵalı Tomanov pen akter Beket Zınýllın bar.
– Men alys aýylda dúnıege kelgen edim. Bala kúnimnen ónerge qushtar bolyp, akterlikti tańdadym. Endi mine, eńbegim elenip, baspanaǵa ıe bolǵanyma qýanyshtymyn, – deıdi Beket Zınýllın.
Oblys ákiminiń aıtýyna qaraǵanda, bıyl óńirge joǵary oqý ornyn bitirgen jas mamandardyń kelýi kútilip otyr. Olarǵa qyzmettik 15 páter bólinipti.
О́ńirdiń munaı-gaz ónerkásibine maman daıarlaıtyn oqý ornynyń biri – S.Muqashev atyndaǵy joǵary polıtehnıkalyq kolledji. Elorda kúni qarsańynda atalǵan kolledjdiń de jańa jataqhanasy ashyldy. Oblys ákimi Mahambet Dosmuhambetovtiń aıtýynsha, bul jataqhana Elbasynyń «Bes áleýmettik bastama» baǵdarlamasyn iske asyrý aıasynda boı kótergen.
– Elimizde álemdik standarttarǵa sáıkes bilim berýdi qalyptastyrý úshin stýdentterge qolaıly jaǵdaı jasaý qolǵa alynyp otyr. Soǵan baılanysty óńirde stýdentter úshin jańa jataqhanalar boı kóterdi. Buǵan deıin úsh kolledjdiń jataqhanasy paıdalanýǵa berildi. Budan bylaı 150 oryndyq jańa jataqhanaǵa ornalasqan polıtehnıkalyq kolledjdiń stýdentteri de alańsyz bilim alady, – deıdi oblys ákimi.
Kolledj dırektory Baǵyt Sherkeshbaevanyń málimetinshe, bes qabatty jataqhananyń jalpy aýdany – 720 sharshy metr. Jataqhananyń «A» blogyndaǵy 125 orynǵa stýdentter ornalasady. Al «V» blogyndaǵy 25 oryn oqytýshylarǵa arnalypty.
– Jataqhana bólmeleri seksııalarǵa bóligen. Ár qabatta oqý kabınetteri, as úı, ashana, kir jýýǵa, kıim útikteýge arnalǵan bólmeler, ústel oıyndarynyń buryshy ornalasqan. Al birinshi qabatta fıtnes, ıoga zaldary, kitaphana, demalys bólmesi, ınternetke qosylǵan kovorkıng-ortalyǵy bar. Munda qaýipsizdik úshin beınebaqylaý jelisi ornatyldy, – deıdi Baǵyt Sherkeshbaeva.
Jańa jataqhanaǵa alǵashqylardyń qatarynda ornalasqan stýdenttiń biri – Saıpolla Bektas. Qazir III kýrsta oqıtyn stýdent Isataı aýdanynan kelipti.
– Eki jyl boıy páter jaldap turdyq. Páter jaldaý úshin aı saıyn 70 myń teńge tóledik. Endi kolledjdiń jataqhanasynda turamyz. Jataqhananyń jaılylyǵy unady. Bos ýaqytymyzda sportpen shuǵyldanýymyzǵa múmkindik jasalyp otyr, – dep qýanyshymen bólisti S.Bektas.
Stýdentterdiń jaıly mekenine aınalatyn jataqhananyń qurylysyn «AS-qurylys» JShS júrgizipti. Seriktestik dırektorynyń orynbasary Nurlan Dılhanovtyń aıtýynsha, ǵımarattyń jalpy quny 670 mln teńgeni quraǵan.
Atyraý oblysy