Qyzylorda oblysynda Syrdarııa ózeni boıyndaǵy qorǵanys bekinisterin tekserý jumystary júrgizildi. Bul týraly Ras.kz habarlady.
«Qyzylorda oblysynda 2013-2014 jylǵy qysqy-kóktemgi kezeńdegi sý tasqynynyń aldyn alý maqsatynda Syrdarııa ózeni boıyndaǵy qorǵanys bekinisteriniń daıyndyǵy men tózimdiligin tekserý júrgizildi. Memlekettik organdar ýákilderinen quralǵan aranıy jumys toby aǵymdaǵy jóndeýdi kerek etetin 21 nysandy tapty. Olardyń 18-i toǵan bolsa, 2-i kópir jáne 1-i gıdrotehnıkalyq qurylys bolyp shyqty», – delingen habarlamada.
Jańaqorǵan aýdanynda 1 yqtımal qaýipti nysan bar. Ol – Qandyaral kólinen joǵary jaqtaǵy Tómenaryq eldi mekeni. Munda uzyndyǵy 2200 metr, eni 2 metr kólemindegi toǵan buzylyp ketken. Osyǵan oraı jasalatyn jer jumystary 8 000 tekshe metrdi quraıdy.
Shıeli aýdanynda osyndaı qaýipti 5 nysan anyqtaldy. Olardyń ishinde Maılytoǵaı, Tartoǵaı jáne Qarǵaly aýyldary tustaryndaǵy 3 toǵan, Bestam aýyldyq okrýgindegi 2 kópir jóndeýdi kerek etedi.
Jalaǵash aýdany da 3 nysannan qaýiptenip otyr. Olar «Taryaryq-1», «Taryaryq-2» ýchaskelerindegi bógetter men «Tań» eldi mekenindegi sý qurylysyna qatysty. Qarmaqshy aýdanynda da 3 nysan qaýip shaqyryp tur. Olardyń bári de toǵan bolyp tabylady. Sondaı 2 toǵan Qazaly aýdanyn da ábigerge salatyn túri bar.
«Qyzylordada qala ákimdigi 2013 jylǵy 30 jeltoqsanda 8 yqtımal qaýipti nysan týraly jazbasha málimet tapsyrdy. Olar negizinen saıajaılar aýdanyndaǵy bógetterden týyndaıdy», – delingen habarlamada. Sol sııaqty sellıýloza-karton zaýyty, dýbdıspanser jáne orman sharýashylyǵy alqaby sekildi óńirler mańyndaǵy toǵandardy bekite túspese bolmaıdy.
Darhan Nazar.
Derekkóz: Ras.kz
Foto: Ras.kz.