Almaty oblysynyń Talǵar aýdanynda 53 jastaǵy jergilikti turǵyn óz aýyldasyn pyshaqtap óltirdi. Kómekke kelgen kishkentaı balany da ol pyshaqpen urǵan. Aýyr jaraqat alǵan balanyń ómiri úshin dárigerler kúresip jatyr, dep habarlaıdy Egemen.kz.
Bul oqıǵa týraly aldymen Talǵar aýdanyna qarasty Kosmos aýylynyń turǵyny áleýmettik jelide jazǵan. Búgin oblystyq Polısııa departamenti aqparatty rastady.
Oqıǵa 11 shildede bolǵan. Kúdikti – 53 jastaǵy er adam (buryn anasyn óltirgeni úshin sottalyp, uzaq jyl túrmede jazasyn ótep shyqqan) kórshi áıeldiń úıine kelip aqsha suraǵan. «Joq» degen jaýap alǵannan keıin ony pyshaqtap óltiredi. Kómekke umtylǵan 9 jasar nemeresin de ol aıaýsyz pyshaqtaı salǵan. Bala dalaǵa júgirip shyǵyp, kómek shaqyryp úlgergen.
«Atalǵan derek boıynsha Almaty oblysynyń Polısııa departamenti asa qaýipti qylmys jasady degen kúdikpen Talǵar aýdanynyń 53 jastaǵy turǵynynyń ustalǵanyn habarlaıdy. Er adam buryn ár túrli qylmystar jasaǵany úshin birneshe ret sotty bolǵan. Qazirgi ýaqytta kúdikti ýaqytsha ustaý oqshaýlaǵyshyna qamaýǵa alyndy. Kisi óltirý jáne adam óltirýge oqtalý deregi boıynsha QR QK-niń 24-baby arqyly jáne 99-babynyń 3-bóligi boıynsha qylmystyq is qozǵaldy, ıaǵnı adam óltirý jáne kámilet jasqa tolmaǵan adamdy óltirýge oqtalý. Qajetti saraptamalar taǵaıyndaldy», delingen oblystyq Polısııa departamenti taratqan habarlamada.
Zardap shekken 9 jasar bala Eńbekshiqazaq aýdandyq aýrýhanasyna jatqyzyldy.