Tamyljyǵan tabıǵatty saf kúıinde saqtaýdyń mańyzy óte zor. Taıaýda «Kıeli tabıǵat» aksııasy aıasynda oblystyq týrızm basqarmasy men oblystyq jastar resýrstyq ortalyǵy bilek biriktirip kýrortty aımaqta eko-senbilik ótkizdi.
Jadyraǵan jaz aılarynda bul óńirge at izin salatyn, máńgi jasyl qaraǵaıy men qoldyń salasyndaı aq qaıyńy qaýlap ósken ormandy alqabyn emin-erkin aralap, saf aýasyn kókirek kere qumarta jutatyn kelimdi-ketimdi kisi az emes. Týrıster dúmep kelgen soń ádeıi jasamasa da, ishki mádenıettiń olqylyǵynan tabıǵattyń aı júzine kireýke túsip jatatyny da bar. Aksııanyń basty maqsaty – jas tolqyndy tárbıeleý. Ekologııalyq mádenıettiń daǵdyǵa aınalýyna kúsh salý. Saıyp kelgende tabıǵatty kútip, oǵan janashyrlyqpen qarap, qashanda qamqor bolýdy jetelerine jetkizip, súıekterine sińirý.
Izgi nıetpen ádiptelgen aksııaǵa oblys ortalyǵy men Býrabaı aýdanynyń eriktileri qatysty. Sóz arasynda jastardyń boıynda týǵan ólkemizdi kútip ustaıyqshy, tabıǵatqa adamdar zalal keltirmesinshi deıtin nıettiń bar ekendigin razylyqpen aıta ketkenimiz oryndy bolmaq. Qatysýshylar eki topqa bólinip, tazalaıtyn aýmaqtarynyń keń bolýyn qamtamasyz etti. Nátıjesinde, júzden astam qapqa qoqys jınaldy. Osydan-aq keıbireýlerdiń tabıǵatty aıalaı bermeıtindigin ańǵarýǵa bolady. Eriktiler toby qoqys jınaýmen qatar, demalýshylar arasynda túsinik jumystaryn da júrgizdi.
– Bul sharanyń ózgelerge úlgi bolatyndyǵy sózsiz. Aldaǵy ýaqytta tabıǵat janashyrlarynyń qatary búgingiden de kóbeıse eken, – deıdi ob- lystyq eriktilerdi qoldaý ortalyǵy front keńsesiniń úılestirýshisi Ásııa Qanasheva.
Bir mezettik is-shara barysynda aýqymdy is tyndyrylǵandyǵyn aıta ketken jón. Eń bastysy, jas tolqyn týǵan ólkeniń tabıǵatyna janashyr. Jaqsy is jalǵasyn taýyp, sátimen sabaqtalyp jatsa, oıǵa alǵan sharýanyń ońynan oralǵany emes pe?!
Aqmola oblysy