COVID-19 ahýaly órshýine baılanysty Dúnıejúzilik densaýlyq saqtaý uıymynyń bas dırektory Tedros Gebreıesýs málimdeme jasady. Ol baı elderdi vaksınany kedeı eldermen bólisýge shyqyrdy, dep habarlaıdy Egemen.kz BUU-nyń Jańalyqtar ortalyǵyna silteme jasap.
«10 aptadan beri azaıǵan ólim kórsetkishi qaıta ósýde. Bizge álemniń barlyq óńirlerinen aýrýhanalardyń qaıtadan tolyp jatqany týraly habarlar túsýde. Vırýstyń Delta nusqasy juqtyrý jaǵdaılary men ólim sanynyń órshýine ákelýde», dedi Tedros Jenevadaǵy brıfıngte.
Qazirgi kezde Delta álemniń 104 elinde anyqtalǵan. DDSU basshysynyń aıtýynsha, ol álem boıynsha eń kóp taralǵan nusqaǵa aınalmaq.
«Vaksınamen qamtý tómen elderdegi ahýal qıyn. Delta jáne basqa nusqalar mundaı elderde juqtyrýdyń qaýipti tolqynyn týdyryp, aýrýhanaǵa túsý men ólimniń joǵary kórsetkishterine ákeledi», dep atap ótti DDSU-nyń basshysy.
Onyń aıtýynsha, tipti aldyńǵy tolqynda ózderiniń densaýlyq saqtaý júıeleriniń arqasynda ınfeksııanyń masshtabty órshýin aldyn alǵan elderdiń ózderi búgingi kúni pandemııa epısentrinde qalyp otyr.
DDSU-nyń bas dırektory tek qana vaksınanyń kómegimen daǵdarystan shyǵa almaıtymyzdy moıyndady, alaıda, onyń aıtýynsha, vaksınalaý – vırýspen kúrestegi qolda bar quraldardyń eń tıimdisi.
«Biz búgin qoǵamdyq densaýlyq saqtaý salasyndaǵy tótenshe jaǵdaıdyń órshýin bastan keshýdemiz. Ol, óz kezeginde, adamdardyń ómirine, olardyń tirshilik etý quraldaryna jáne álem ekonomıkasyn qaıta qalpyna keltirýge odan saıyn qaýip tóndirip otyr», dedi DDSU-nyń ókili.
Onyń aıtýynsha, ahýal vaksına qory az jerlerde nashar, degenmen pandemııa esh jerde bitken joq.
«Qazirgi ujymdyq strategııa meniń esime orman órtimen kúresýshi órt sóndirý komandasyn salady. Sý quıý arqyly bir jerdegi alaýdy aýyzdyqtaýǵa bolady, biraq basqa jerde ot laýlap tursa, shoqtar jan-jaqqa tarap, qaıtadan qorqynyshty jalynǵa aınalady», dedi Tedros.