QR Ekologııa, geologııa jáne tabıǵı resýrstar mınıstri Maǵzum Myrzaǵalıev ÚEU jáne azamattyq sektor ókilderimen kezdesý barysynda aldaǵy ýaqytta sý mólsheri tómendeýi múmkin ekenin aıtty, dep habarlaıdy Egemen.kz.
Jıyn barysynda mınıstr sý resýrstaryn basqarý máselelerine toqtalyp, ózender aǵyny qalaı qalyptasatynyn túsindirdi.
«О́zen resýrstarynyń naqty kórsetkishteri sońǵy jyldary shamamen 90-100 tekshe metrdi quraıdy. Onyń ishinde 51,8 tekshe metri jergilikti aǵyn, 39,2 tekshe metr Qytaıdan, sondaı-aq Ortalyq Azııa elderimen Reseıden trans shekaralyq ózender arqyly kelip túsedi. 3,5 myńnan astam ken oryndarynda jylyna 15,5 tekshe metr kóleminde jerasty sýlarynyń qory bar. Geografııalyq turǵydan olar birkelki bólinbegen», dedi Maǵzum Myrzaǵalıev.
Mınıstr ekologııalyq qajettilikke shamamen 50 tekshe metr sý qajet ekenin de aıtty. Al paıdalanylatyn sýdyń jalpy kólemi 25 tekshe metrdi quraıdy eken. Onyń ishinde aýyl sharýashylyǵyna - 15 kýb km, ónerkásipke - 6, kommýnaldyq sharýashylyqqa - 1 kýb km tıesili. Sondaı-aq tasymaldaý kezindegi shyǵyn - 3 kýb km teń.
«Búgingi tańda eldegi sýmen qamtý ekonomıkalyq salalardy qanaǵattandyryp otyr. Degenmen aldaǵy ýaqytta sý mólsheri tómendeýi múmkin. Ol sýdy kóp mólsherde tutyný men keıbir elderdiń sýdy bólýine baılanysty. Oǵan qosa ınfraqurylymnyń eskirýin eskersek, sý shyǵyny kóbeıedi dep kútilýde. Máselen, aýyldy jerdegi kanaldardaǵy sý shyǵyny 45%-ǵa deıin jetýi múmkin. Sý shyǵynyn azaıtý úshin sý arnalaryna jedel túrde jóndeý jumystaryn júrgizý kerek», dedi Ekologııa, geologııa jáne tabıǵı resýrstar mınıstri.
Mınıstr sý balansyn 90-100 kýb km deńgeıinde ustap turý úshin aldymyzda 2030 jylǵa qaraı qosymsha sý resýrstaryn paıdalaný, sý resýrstaryn sıfrlandyrý arqyly sýdy únemdeý mindeti turǵanyn aıtty.