QR BǴM vedomstvolyq baǵynyshty memlekettik jáne ulttyq joǵary oqý oryndary ótken eki jylda 600-den astam jańa jáne 100-ge jýyq ınnovasııalyq bilim berý baǵdarlamalaryn engizdi. Bul týraly BǴM baspasóz qyzmeti habarlady.
Jańa bilim berý baǵdarlamalaryna joǵary oqý oryndarynda buryn-sońdy kadrlar daıarlaý júzege asyrylmaǵandary, al ınnovasııalyq baǵdarlamalarǵa ýnıversıtette alǵash ret engizilip otyrǵan jáne basqa JOO-da joq bilim berý baǵdarlamalary jatady.
Jańa bilim berý baǵdarlamalarynyń basym bóligi «Pedagogıkalyq ǵylymdar» (20%), «Bıznes, basqarý jáne quqyq» (18%), «Injenerlik, óńdeý jáne qurylys salalary» (16%) baǵyttary boıynsha ashyldy. Mundaı úrdis pedagogterdiń mártebesin arttyrýmen, sonymen birge el ekonomıkasyndaǵy óńdeýshi jáne qurylys salalaryn damytýǵa degen suranyspen baılanysty.
«BǴM-ge vedomstvolyq baǵynyshty ulttyq jáne memlekettik joǵary oqý oryndarynyń barlyq jańa jáne ınnovasııalyq baǵdarlamasy joǵary jáne joǵary oqý ornynan keıingi bilim berý baǵdarlamalarynyń tizilimine engizilgen. Bul olardyń joǵary oqý oryndarynyń bilim berý qyzmetine qoıylatyn biliktilik talaptaryna sáıkestigin rastaıdy. Qazir biz bilim berý sapasyna degen suranysty kúsheıtip jatyrmyz. Engizilip jatqan baǵdarlamalar jumys berýshilermen birlesip, olardyń mamandarǵa qoıatyn talaptary men suranystaryn eskere otyryp ázirlengen», dep atap ótti QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Máselen, Qaraǵandy tehnıkalyq ýnıversıtetinde 2019 jyldan bastap 7 jańa bilim berý baǵdarlamasy boıynsha mamandar daıarlaý júrgizilip keledi. Bul «Mashına jasaý salasyndaǵy sıfrlyq tehnologııalar», «Basqarýdyń kiriktirilgen sıfrlyq júıeleri», «Taý-ken kásiporyndary men jerasty qurylystaryn salý», «Sıfrlyq aerofototúsirilim», «Tamaq bıoındýstrııasy», «IT-medısına» jáne «Jerdi qashyqtyqtan aldyn ala tekserý».
Ulttyq jáne memlekettik joǵary oqý oryndary sondaı-aq «Kıberpedagogıka», «Sıfrlyq analıtıkalyq bilim berý júıelerin jobalaý», «Jasandy ıntellekt tehnologııalary», «Ushatyn apparattardyń ushý dınamıkasy jáne qozǵalysyn basqarý», «Medısınalyq ınjınırıng» jáne basqa da ınnovasııalyq bilim berý baǵdarlamalary boıynsha mamandar daıarlaıdy.
Toraıǵyrov ýnıversıtetinde (burynǵy «S.Toraıǵyrov atyndaǵy Pavlodar memlekettik ýnıversıteti») Computer Science ınnovasııalyq jańa fakýlteti quryldy. Ýnıversıtet stýdentteri kıberqaýipsizdik, baǵdarlamalyq ınjenerııa, veb-ázirleý, DevOps-ınjenerııa, grafıka jasaýdy úırenedi. Olarǵa IT salasynyń tájirıbeli mamandary sabaq beredi.
Sondaı-aq ótken eki jyldyń ishinde joǵary oqý oryndarynda «Sıfrlyq pedagogıka», «STEM-bilim berý», «Aqparattyq qaýipsizdik», «Adam resýrstaryn basqarý» jáne basqa da bilim berý baǵdarlamalary jańartyldy.
Joǵary oqý oryndary basqa da bilim berý baǵdarlamalaryn odan ári jetildirý ári ózektendirý boıynsha jumys júrgizedi. Búginde qoldanystaǵy baǵdarlamalardyń 40%-dan astamy jańartyldy. Baǵdarlamalarǵa jańa pánder men tájirıbege baǵyttalǵan kýrstar engizilgen.
Bilim men ǵylymdy damytýdyń 2020-2025 jyldarǵa arnalǵan memlekettik baǵdarlamasy aıasynda jańa bilim berý baǵdarlamalaryn engizý jalǵasatyn bolady.