Jýyrda ǵana «jasyl aımaqta» bolǵan óńir bar bolǵany bir aptanyń ishinde aldymen «saryǵa», odan toqtaýsyz «qyzylǵa» ótip otyr. Sońǵy aptadaǵy syrqattaný 141 jaǵdaıdan 279 jaǵdaıǵa deıin kúrt eki esege artty jáne odan ári ósý úrdisi bar. Bul jaǵdaı, ásiresei aýdandarda baıqalady. Máselen, Qyzyljar aýdanyndaǵy syrqat jandar sanynyń ósimi 2,6 ese, Aqqaıyń aýdanynda 3,8 esege, Ǵabıt Músirepov aýdanynda 4,7 ese, Taıynsha aýdanynda 1,9 ese artqan.
Sońǵy táýlikte jaman indetpen tirkelgender sany 55-ke jetip, respýblıkanyń basqa aımaqtaryna qaraǵanda az bolǵanymen epıdemııalyq jaǵdaıdy baǵalaý matrısasyna sáıkes turaqty ósim bolyp otyrǵandyqtan, oblys «qyzyl aımaq» qataryna jatqyzyldy. Buǵan 100 myń turǵynǵa shaqqandaǵy syrqattanǵandar sany, sondaı-aq ınfeksııanyń taralý deńgeıin kórsetetin reprodýktıvti kórsetkish te áser etedi.
О́tken táýlikte oblystaǵy barlyq syrqattanǵandar sany 15 675 adamǵa jetti. Al sońǵy táýlikte tirkelgen 55 jaǵdaıdyń 51 nemese 93%-y aýrý belgileri bar jáne 4 jaǵdaı nemese 7%-y aýrý belgileri joq. Sonyń ishinde syrqattanǵandar Petropavl qalasynda – 24, Aıyrtaý aýdanynda – 10, Qyzyljar aýdanynda – 5, Esil men Aqjar aýdandarynda – 4, Shal aqyn aýdanynda – 3, Jambyl jáne Ýálıhan aýdandarynda – 2 jáne Ǵabıt Músirepov aýdanynda 1 jaǵdaı tirkeldi.
Syrqattanǵandardyń jasy da ózgerdi. Qazirgi ýaqytta aýyrǵandardyń 57%-y 40 jastan kishi, buryn bul kórsetkish 40%-dan aspaǵan. Soltústik Qazaqstan oblysy sanıtarlyq-epıdemıologııalyq baqylaý departamentiniń basshysy Áset Jumataevtyń aıtýyna qaraǵanda, syrqattyń kóbeıýi respýblıka aýmaǵynda «Delta» shtamynyń aınalymymen, sondaı-aq halyqtyń karantındik sharalardy saqtaý jónindegi tártibiniń tómendeýimen baılanysty eken. Bul rette oblystyq vedomstvoaralyq komıssııanyń sheshimimen 14 shildeden bastap jańa shekteýler engizildi.
Oblysta vaksınanyń birinshi komponentin alǵandar sany – 165 525 adam. Bul barlyq alýǵa tıisti halyqtyń 53,2%-y degen sóz. Sonyń ishinde 83 725 adam ekinshi komponentti aldy nemese bul 26,9%.
Soltústik Qazaqstan oblysy