Bıyl jyl sońyna deıin Aqtóbe men Atyraý oblystaryn baılanystyratyn respýblıkalyq mańyzy bar «Qandyaǵash –Maqat» avtomobıl jolyn rekonstrýksııalaýdy aıaqtaý josparlanyp otyr. Indýstrııa jáne ınfraqurylymdyq damý mınıstrliginiń baspasóz qyzmetinen málim etkendeı, atalǵan jol ótken ǵasyrdyń 60-jyldarynda salynǵan. Elý jyldan asa merzimnen beri munda tek aǵymdaǵy jóndeý jumystary júrgizilgen. Sondyqtan sońǵy ýaqytta avtokólik júrgizýshileri tas jol boıyndaǵy aýyl arasyndaǵy joldarmen júrýge májbúr boldy.
«Rekonstrýksııa jobasy jalpy uzyndyǵy 304 shaqyrymdyq jeti ýchaskeni, sondaı-aq temir jol arqyly 11 kópir men eki jol ótkelin salýdy qamtıdy. Bul jumys bastalǵanǵa deıin Qandyaǵashtan Maqat aýylyna deıingi jol ýaqyty kem degende 11-12 saǵatty, al Atyraý qalasyna deıin 14 saǵatty quraǵan edi. Jańǵyrtý jumystary aıaqtalǵannan keıin Qandyaǵashtan Maqatqa deıingi júrý ýaqyty shamamen 4 saǵatty, al Atyraýǵa deıin 6 saǵatty quraıtyn bolady», dep málim etti baspasóz qyzmetinen.
Jol qurylysynyń bas merdigerleri – «Todını», «Shanhaı Konstrakshn», «Akkord» BK/«Aq jol qurylys» jáne «Ant Inshaat» kompanııalary. Bıyl bul kompanııalar 1 353 myń tonna asfaltbeton tóseýi qajet. Búginge deıin onyń 1 008 myń tonnasy tóseldi.
«Jobany iske asyrýǵa shamamen 1000 adam men 680-nen asa tehnıka jumyldyrylǵan. Budan bólek joba aıasynda Atyraý oblysy Maqat aýdanynyń Dossor aýylyna aınalma jol salynýda. Bul Dossor kentiniń turǵyndary úshin qaýipsizdigin qamtamasyz etedi. Atalǵan jobany iske asyrý jol boıyndaǵy qyzmet kórsetý nysandaryn damytýǵa, demalys oryndaryn uıymdastyrý arqyly jergilikti turǵyndardyń kásipkerlik qyzmetke bet burýyna oń yqpal etedi», dep habarlady mınıstrliktiń baspasóz qyzmeti.
Sondaı-aq «Aqtóbe-Atyraý- Reseı Federasııasy shekarasy» baǵytyndaǵy avtomobıl jolynyń Atyraý oblysy aýmaǵyndaǵy bóligin jóndeý jumysy da atqarylyp jatyr. Oblys ákimi Mahambet Dosmuhambetovtiń málimetinshe, bıyl jalpy uzyndyǵy 277 shaqyrymdy quraıtyn joldyń 60 shaqyrymyn jóndeýdi aıaqtaý josparlanyp otyr. Qazir onyń 20 shaqyrymy paıdalanýǵa berildi. Al qalǵan 40 shaqyrymdyq joldy jóndeý qarqyn aldy.
«Qazavtojol» AQ ulttyq kompanııasy tapsyrys bergen merdiger mekemelerde 226 adam turaqty jumyspen qamtylyp, 78 arnaıy tehnıka jumyldyrylǵan. Sondaı-aq 217 shaqyrymdyq ýchaskede joldyń negizgi qabatyn ornalastyrý, kommýnıkasııa jelilerin aýystyrýmen qatar, 25 sý ótkizetin qubyr tóseý júrgizilýde. Belgilengen aýmaqtaǵy jumysty atqarýǵa 183 arnaıy tehnıka men 367 adam tartylǵan. Buǵan qosa joldyń sapasyn anyqtaıtyn zerthanalar jumys isteýde.
– Memleket basshysy avtokólik joldaryn jańǵyrtýǵa, ásirese, sapasyna basa mán berip otyr. Ákimdik tarapynan mańyzdy jobany júzege asyrý úshin jan-jaqty qoldaý kórsetiledi. Sondyqtan jaýapty merdiger mekemelerge jol qurylysynyń zamanaýı talaptarǵa saı ári sapaly bolýyna, qaýipsizdik máselesine nazar aýdaryp, jóndeý jumysyn belgilengen merzimde aıaqtaýy tıis, – deıdi oblys ákimi Mahambet Dosmuhambetov.
Jobaǵa sáıkes, atalǵan jol 6 jolaqty bolady. Jol jóndeý jumystary 2022 jyldyń sońyna deıin aıaqtalady.
Atyraý oblysy