Bıyl Aqtóbedegi Tahaýı Ahtanov atyndaǵy oblystyq drama teatry qazaq trýppasynyń qurylǵanyna 30 jyl toldy. El táýelsizdigin alǵan jyly qazaq kásibı mýzykasynyń negizin qalaýshy ǵalym, kompozıtor, ustaz, akademık Ahmet Jubanovtyń týǵan jerinde birneshe óner ujymy ashylyp, jumysyn bastaǵan bolatyn. Sonyń biri osy qazaq teatry edi.
Ulttyń rýhanı kemeldenýine, ulttyq jáne álemdik ádebıettiń kıeli sahna arqyly oqyrmanyna jetýine qyzmet etetin teatr óneriniń bar jaýapkershiligin moınyna alǵan ujym alǵashqy kúnnen bastap bul mıssııany túsine bildi jáne sonyń jolynda tynymsyz eńbek etip keledi.
Elbasynyń «Uly dalanyń jeti qyry» baǵdarlamasyn iske asyrý maqsatynda el Táýelsizdiginiń 30 jyldyǵy men teatrdyń qazaq trýppasynyń qurylǵanyna 30 jyl tolý merekesine oraı oblysta «Uly dala teatr kerýeni» atty gastaroldik sapar uıymdastyrylǵan bolatyn. Bul – teatrdyń jańa jobasy. Osy joba aıasynda teatr ujymy oblystaǵy aýdan ortalyqtary men aýyldarǵa gastroldik saparmen baryp qaıtty. Joba eki baǵytta júrgizildi: birinshi top Abaıdyń týǵanyna 175 jyl tolýyna baılanysty uly oıshyldyń jáne jergilikti aqyn-jazýshylardyń shyǵarmashylyǵyn nasıhattaý maqsatynda ádebı-tanymdyq keshter uıymdastyrdy. Al ekinshi baǵyttaǵy top kórermenge S.Ahmadtyń «Kelinder kóterilisi» komedııasyn, U.Esdáýlettiń «Qara pıma» dramasyn jáne balalarǵa arnalǵan M.Álibektiń «Aldar kóseniń sıqyrly dúrbisi» ertegisin usyndy.
– Bul joba maqsaty – kórermendi rýhanı qundylyqqa tárbıeleı otyryp, teatr álemine qyzyǵýshylyǵyn arttyrý, teatr ónerin kásibı turǵyda damytý, qazaq qalamgerleriniń shyǵarmashylyǵyn nasıhattaý, ultymyzdyń mádenıetin, salt- dástúrin jandandyrýǵa atsalysý, turǵyndardyń ótken sharadan alǵan pikirin saralaı otyra, teatr ónerin órkendetýdiń srategııalyq josparyn jasaý, – deıdi Tahaýı Ahtanov atyndaǵy Aqtóbe oblystyq drama teatrynyń dırektory Oljas Ibraev.
Teatr ujymy Shalqar, Áıteke bı, Alǵa aýdandary sekildi birneshe eldi mekendegi kórermenimen qaýyshty. Sońǵy bir-eki jyldyqta álemdi jaılaǵan qaýipti indettiń saldarynan karantındik shekteýler jarııalanyp, bir-birimen erkin aralasýǵa da múmkindigi bolmaǵan aýdan, aýyl turǵyndary úshin teatrdyń kelýi qýanyshty jańalyq boldy. Teatrdyń bul jobasy osy rýhanı oqshaýlanýdyń ornyn toltyrǵandaı boldy.
Maýsym aıynyń aıaǵynda teatr ujymy Bershúgir, Shalqar, Qarabutaq, Aqaı, Qaraqobda aýyldaryna baryp, birneshe qoıylymdy kórermen nazaryna usyndy. Al ekinshi top Shalqar, Áıteke bı aýdandarynda «Abaı álemi» atty ádebı-poezııalyq kesh ótkizdi. Bul ádebı sharanyń maqsaty – jastardyń qazaq ádebıetine, mádenıetine degen qyzyǵýshylyqtaryn oıatyp, Abaı shyǵarmashylyǵyn nasıhattaý. О́nerpazdar Abaı óleńderimen qosa qazaqtyń halyq ánderin oryndap, jıylǵan kórermenge de aqynnyń qarasózderin kezektese oqýǵa múmkindik berdi. Ásirese, balalar belsendi boldy.
– Karantındik shekteý sharalarynyń jeńildeýine baılanysty gastroldik saparymyzdy aýdandardan bastadyq. Teatrymyz ózge óńirlerge úzdik qoıylymdarymen úlgi bolýy kerek. Bul is-sharamyz eń áýeli sahna maıtalmandaryna shyǵarmashylyq tájirıbe syılady, ári izdeniske jol ashty, – deıdi teatr dırektorynyń orynbasary Jandos Jáýmituly.
Gastrol aıaqtalar tusta teatr ujymy Alǵa aýdanyndaǵy Aqaı, Qaraqobda sekildi birneshe aýylǵa baryp qaıtty. Balalarǵa arnalǵan Meıirjan Álibektiń «Aldar kóseniń sıqyrly dúrbisi» ertegisinde qazirgi sheteldik mýltfılmderdiń О́rmekshi adam, Makýın, Masha sekildi keıipkerleri de sahnaǵa shyǵarylǵan bolatyn. Ony kórgen balalar ózderi obrazǵa kirip, máz bolysty. Al keshki ýaqytta taıaýda ǵana teatrda premerasy ótken Ulyqbek Esdáýlettiń «Qara pıma» psıhologııalyq dramasy usynyldy.
– El arasynda túrli problema bolady. Kórermen bul qoıylymdy yqylaspen tamashalady. Kórermenniń pikirin tyńdap, qoǵamdaǵy «maskúnemdik» máselesiniń eshqashan eskirmeıtindigin baıqadyq, – dedi teatr dırektorynyń orynbasary Jandos Jáýmituly.
Al osydan birneshe aı buryn rejısser Aıdyn Salbanov sahnalaǵan Barzý Abdýrazakovtyń «Aınalaıyn» dramasynda eki keıipker ǵana bar: ana men bala.
– Qoıylymda ana rólin somdaǵan aktrısa Maıra Ilıasovanyń bul obrazy erekshe boldy: aktrısa júregi názik te, qaısar ana rólin óz bıiginde oryndap shyqty. Ana men balanyń dıalogy árbirimizdiń júregimizdiń túkpirinde jatqan sezimderdi oıatqandaı boldy, – deıdi kórermender.
Meıramgúl RAHATQYZY