Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, úsh kúnde qaýipti vırýsty juqtyrýshylar sany kúrt kóbeıip, 46,8 paıyzǵa ósken. Máselen, 8 shildede 154 jaǵdaı tirkelse, 11 shildede 290, al 12 shildedegi málimetke súıensek, taǵy da 334 adam koronavırýs ınfeksııasyna shaldyqqan.
Naýqastar sany, ásirese, Atyraý qalasynda kóbeıip tur. Bir kúnde shaharda 280 naýqastyń tirkelýi alańdatpaı qoımaıdy. Buǵan qosa Teńiz kenishinde 10 naýqas tirkeldi. Sondaı-aq óńirdegi jeti aýdannyń bárinde qaýipti vırýstyń «qaqpanyna» túskender tabylyp otyr. Naqtylaı aıtqanda, Qurmanǵazy aýdanynda – 17, Jylyoıda – 11, Inderde – 6, Maqatta – 4, Isataıda – 2, Mahambette – 2, Qyzylqoǵa aýdanynda 2 adamnan koronavırýs ınfeksııasynyń belgisi anyqtaldy.
Osyǵan baılanysty ınfeksııalyq stasıonarlarǵa jatqyzylǵan naýqastar sany da arta bastady. Qazir 806 adam emdelip jatyr. Onyń ishinde modýldik aýrýhanada – 188, aýdandardaǵy stasıonarlarda – 188, №2 oblystyq aýrýhanada – 150, kardıologııalyq ortalyqta – 108, ftızıopýlmanologııalyq ortalyqta – 103 naýqas em alýda. Teńiz ken ornyndaǵy ınfeksııalyq stasıonarda 69 adam emdelip jatyr. Al úı jaǵdaıynda 1 080 pasıent em-dom alýdy jalǵastyrýda.
– Atyraýda naýqastardyń deni PTR-test júrgiziletin zerthanalarda jasalǵan qorytyndynyń nátıjesimen anyqtalyp otyr. Qazir óńirde koronavırýs ınfeksııasyna qarsy zertteý júrgiziletin 14 PTR-test zerthanasy jumys isteıdi. Bul zerthanalarda táýligine 14 myńnan asa zertteý júrgiziledi. Elimizde koronavırýs ınfeksııasy tirkelgen byltyrǵy naýryzdan beri óńirde júrgizilgen PTR-test sany 1 mln 292 myńdy qurady, – deıdi A.Baıdýálıev.
Onyń málimetine qaraǵanda, qaýipti vırýstyń taralý kórsetkishiniń ósýine baılanysty 520 rezervtik tósektik oryn daıyndalypty. Onyń ishinde 20 tósektik oryn jansaqtaý bólimine bólinip otyr. Karantındik stasıonar úshin 408 tósektik oryn ashylǵan.
– Koronavırýs ınfeksııasyna shaldyqqan naýqastar sany kúrt ósetin bolsa, taǵy birneshe aýrýhanadan ınfeksııalyq stasıonar ashýdy kózdep otyrmyz. Naqtylaı aıtqanda, oblystyq aýrýhanada – 50, temir jol aýrýhanasynda – 120, Mahambet aýdanyndaǵy ftızıopýlmonologııalyq ortalyqta – 150, sondaı-aq jataqhananyń birinde 200 oryndyq ınfeksııalyq stasıonar ashylady. Qazir 2 428 oryndyq ınfeksııalyq stasıonarlarda 806 naýqas emdelý úshin oqshaýlandy. Stasıonarlardaǵy júkteme – 33,2 paıyz. Jansaqtaý bóliminde 108 oryn bar. Qazir bul bólimde jaǵdaıy aýyr 53 naýqas jatyr. Naýqastardyń jeteýi ókpeni jasandy jeldetý apparatyna qosylǵan. Mundaǵy júkteme 49 paıyzdy qurap otyr, – deıdi A.Baıdýálıev.
Oblystyq jumyspen qamtý jáne áleýmettik baǵdarlamalar basqarmasy mamandarynyń aıtýynsha, memlekettik ataýly áleýmettik kómek alatyn otbasylarǵa medısınalyq alǵashqy kómek jıyntyǵy taratylyp jatyr. Maqsat – koronavırýs ınfeksııasynyń taralýynyń aldyn alý.
– Medısınalyq alǵashqy kómek jıyntyǵynyń quramyn Densaýlyq saqtaý mınıstrligi bekitken. Soǵan sáıkes, 952 medısınalyq qorǵaý quraldary qobdıshasyn Atyraý qalasy men aýdandarda turatyn otbasylarǵa taratýdy kózdedik. Medısınalyq qorǵaý quraldary jıyntyǵyna sıfrly termometr, 100 dana medısınalyq maska, 2 dana qolǵa arnalǵan antıseptık, ıboprofen (400 mg, 20 tabletka), parasetamol (500 mg, 20 tabletka) salynǵan, – dep habarlady basqarma mamandary.
Dárigerler qaýipti vırýstyń taralýyn tejeý úshin vaksına alýdyń qajettigin áli de aıtyp jatyr. Tipti vaksına alýshylardy yntalandyrýdyń túrli sharasy qolǵa alynyp jatyr. Máselen, oblystyq «Azamattyq Alıans» ZTB uıymdastyrǵan aqshalaı utys oıyny ár on kún saıyn 30 qyrkúıekke deıin vaksına alǵandar arasynda oınatyla bastady. Aqshalaı utystyń alǵashqy oıyny 11 shildede tikeleı efırde ótti. Táýelsiz baqylaýshylardyń qatysýymen kezdeısoq sandardy tańdaý arqyly 10 sertıfıkattyń ıesi anyqtaldy. Olardyń árqaısysyna 200 myń teńgeniń sertıfıkaty tapsyryldy.
Endi osyndaı utys oıynyn «Baızar» saýda-oıyn saýyq ortalyǵy da qolǵa aldy. Bas júlde – 1 mln teńge. Utys oıynyna 1 shilde – 1 qyrkúıek aralyǵynda vaksına alǵan turǵyndar qatysady.
Mundaı yntalandyrý sharalarynan soń óńirde kún saıyn vaksına alýshylar qatary arta bastaǵany baıqalady. Oblystyq densaýlyq saqtaý basqarmasynyń deregine súıensek, 12 shildede 3 183 adam vaksına saldyrǵan. Osylaısha, 1 aqpannan beri 118 201 atyraýlyq Spýtnık V, QazVac, Hayat-Vax vaksınalarynyń birinshi komponentin ektirdi. Vaksınalardyń ekinshi komponentin alǵandar sany 62 535 adamǵa jetip otyr.
Atyraý oblysy