Bilim jáne ǵylym mınıstrliginiń baspasóz aqparaty boıynsha eki jyl ishinde Qazaqstannyń joǵary oqý oryndary 600-den astam jańa jáne 100-ge jýyq ınnovasııalyq bilim berý baǵdarlamalaryn engizdi, dep habarlaıdy Egemen.kz.
Munda kadrlardy daıarlaýda buryn-sońdy júzege asyrylmaǵan baǵdarlamalar men alǵash ret kiristirilip otyrǵan jobalar bar. Bul rette elimizde balamasy joq jobalardy da atap ótken jón.
D.Serikbaev atyndaǵy ShQTÝ-de mundaı 32 baǵdarlama qarastyrylǵan. Barlyǵy Qazaqstan ekonomıkasyn damytý jolynda eńbek etetin mamandardy daıarlaýǵa baǵyttalǵany anyq. Sonyń biri, biregeıi – medısınalyq ınjenerıng. Aıtar bolsaq, «Medısınalyq ınjınırıng» baǵyty boıynsha bilim berý baǵdarlamasy D.Serikbaev atyndaǵy Shyǵys Qazaqstan Tehnıkalyq Ýnıversıtetinde 6V07105 «Aspap jasaý» mamandyǵy sheńberinde bakalavrlardy daıarlaıdy.
Oqý medısınalyq tehnıkalardy óndirýmen aınalysatyn álemdik fırmalardyń baǵdarlamalary negizinde júrgiziledi. Olardyń metodıkalary bilikti, bilimdi ári suranysqa ıe mamandardy daıarlaýǵa arnalǵan. Oqytýdaǵy ádis-tásilderdiń ózi sheteldik professorlarmen tize qosa otyryp jasaldy.
Stýdentterdi daıarlaý kezinde elimizde qoldanylatyn medısınalyq tehnıkalardyń qurylysyn, qoldaný erekshelikterin, jumys isteý prınspterin kórsete otyryp oqytady. Atap aıtqanda, Siemens, Roche Diagnostics GmbH, Tem Innovations GmbH, Arkray, Iris, BST medısınalyq tehnıkalardy paıdalanady. Qoldanystaǵy jabdyqtar tájirıbe jınaqtaýǵa mol múmkindik beredi.
Sóıtip oqýdy támamdaǵan túlek jumys tájirıbesine, jeke jetistikterine qaraı ınjener, ınjener-konstrýktor, ınjener zerthanashy, jóndeý jónindegi ınjener, óndiristi daıyndaý jónindegi ınjener, metrolog syndy mamandyqtardy alyp shyǵady. Bakalavr bolyp shyqqan soń «Medısınalyq ınjınırıng» boıynsha ShQTÝ magıstratýrasynda oqýyn jalǵastyrýǵa múmkindigi bar. Pedagogıkalyq profıldiń kásiptik baǵdarlamasyn ıgergen jaǵdaıda, doktorantýraǵa túsýge bolady. Minekı, jańa ádistiń bilim alam deýshilerge múmkindigi mol.