Osy jyldyń 25 shildesinde Qyzylorda oblysynan aýyl ákimderiniń saılaýyna 131 úmitker qatysady. Oblystyq saılaý komıssııasynyń dereginshe, aımaqtaǵy 40 aýylda saılaýǵa túsetinderdiń kópshiligi – ózin ózi usynǵandar.
Kandıdattardyń 82-si – memlekettik qyzmetshi. Onyń ishinde 24-i – burynǵy aýyl ákimderi. Aýyl basqarýǵa talap qylyp otyrǵandardyń arasynda bıýdjettik sala men kommersııalyq qurylym ókilderi de bar. Úmitkerlerdiń basym bóligi – muǵalimder, zańgerler men ekonomıster de az emes, ózge sala ókilderi de bar. Kandıdattardyń 9-y – áıel. Qazir úmitkerlerdi usyný jáne tirkeý kezeńi ótip, úgit-nasıhat jumystary bastaldy.
Osyǵan baılanysty Májilis depýtaty, Nur Otan partııasy fraksııasynyń múshesi Gennadıı Shıpovskıh, partııanyń ortalyq apparatynyń qyzmetkeri Gúlnar Nurahmethanova jáne partııa atynan Qarmaqshy aýdanyndaǵy Aqaı aýyly ákimdigine úmitker Elmıra Qazıeva turǵyndarmen kezdesti.
Karantın talaptaryna saı aýyldyq klýb aldynda ótken kezdesýge aýyl turǵyndary, aqsaqaldar, jastar jınaldy.
Kezdesýde Gennadıı Shıpovskıh partııanyń saılaýaldy baǵdarlamasynyń Jol kartasy negizinde atqarylyp jatqan jáne júzege asyrylǵan jumystarǵa toqtalyp ótti.
– Partııanyń 5 jylǵa arnalǵan saılaýaldy baǵdarlamasynda osy aýylǵa qatysty da biraz jańalyq bar. Qazir oblys boıynsha Jol kartasynda jobalanǵan jumystardyń 16%-y júzege asyrylyp otyr. Atap aıtar bolsam, 6000-ǵa jýyq turǵyny bar Aqaı aýyldyq okrýgindegi elektr jelilerin keńeıtý jáne qaıta jańǵyrtý júzege asyp, onyń ıgiligin el kórýde, – dedi depýtat.
Kezdesýge aldaǵy ótetin aýyl ákimderiniń tikeleı saılaýynda Aqaı aýyldyq okrýgi ákimdigine Nur Otan partııasynan úmitker Elmıra Qazıeva jerlesterine óziniń saılaýaldy baǵdarlamasyn jan-jaqty tanystyrdy.
Úmitker saılaýda jerlesteri senim bildirse, alǵan bilimi men ómirden jınaqtaǵan tájirıbesin aýyldastarynyń ál-aýqatyn, turmys-tirshiligin jaqsartýǵa jáne sharýashylyq qurylymdarynyń ekonomıkalyq nyǵaıýyna jumsaıtynyn aıtty. Halyqtyń buqaralyq sportpen aınalysýyna, aýyldaǵy mádenıettiń damýyna múmkindik jasap, jastar bos ýaqytyn tıimdi paıdalanatyn is-sharalardyń uıymdastyrylýyna, partııalyq jobalardyń júzege asýyna jáne jumyssyz jastardyń ómirden óz jolyn tabýyna yqpal etetinin jetkizdi.
Kezdesý barysynda aýyl turǵyndary ózderiniń talap-tilekteri men usynystaryn aıtty.
Qyzylorda oblysy