Tokıodaǵy Olımpııa oıyndaryn uıymdastyrý komıtetiniń bas dırektory Tosıro Mýto dúbirli doda bastalǵanǵa deıin jaǵdaı ýshyǵyp ketse, oıyndar bolmaýy múmkin ekenin aıtty.
Jarystyń ashylý saltanaty 23 shildege josparlanǵany belgili. 20 shilde kúni Olımpıada qalashyǵynda tekseris kezinde koronavırýspen 9 adamnyń jańadan aýyrǵany belgili boldy. Olardyń ishinde úsh sportshy bar: eki ońtústikafrıkalyq fýtbolshy jáne Chehııadan kelgen jaǵajaı voleıbolynyń oıynshysy. Jalpy Olımpıadaǵa kelgen sportshylar men delegattar arasynan indetti juqtyrǵandar sany 71-ge jetti.
Skysports.com-nyń habarlaýynsha, T.Mýto aldaǵy ýaqytta koronavırýs juqtyrǵandar sany qandaı bolatynyn boljaı almaıtynyn aıtqan. «Eger tolqýlar bolsa, biz koronavırýs jaǵdaıyna súıene otyryp, taǵy da bes jaqty kelissózder júrgizemiz dep kelistik. Qazirgi ýaqytta koronavırýs juqtyrǵandar sany artýy nemese azaıýy múmkin. Sondyqtan biz jaǵdaıdy jiti baqylaýda ustaımyz», dedi Mýto.
Saýaldamalarǵa súıensek, el turǵyndarynyń kópshiligi bıylǵy Olımpııa oıyndarynyń ótýine qarsy. Jappaı narazylyq saldarynan Olımpıadanyń negizgi demeýshileriniń biri Toyota kompanııasy teleefırden oıynǵa baılanysty jarnamasyn alyp tastady. Al onyń basshylyǵy ashylý rásimine qatyspaý týraly sheshim qabyldady. Sebebi eldegi pandemııaǵa qatysty jaǵdaı qıyn bolyp tur. 19 shildedegi ahýal boıynsha Japonııada ınfeksııany juqtyrǵandar sany
2 368-ge artty. Olardyń jartysyna jýyǵy Tokıoda tirkelgen.