Sarapshylar teńge dınamıkasyndaǵy ózgeriske munaı baǵasynyń arzandaǵany áser etip jatqanyn aıtady, dep jazady Egemen.kz seısenbidegi KASE qortyndysyna silteme jasap.
Qazaq teńgesiniń baǵasy seısenbide KASE qor bırjasyndaǵy saýda-sattyqta tómendegeni baıqaldy.
Brent markaly barreli eki aıdaǵy eń tómengi kórsetkish 68,69 dollardan satylýda. Dúısenbi sessııasynda Soltústik teńiz shıkizatynyń «barreli» 5 dollardy joǵaltty. Naryq OPEK + óndirisin odan ári damytý týraly sheshimder qabyldady: Múshe elder qolaıly sátti kútip ishten tynyp otyr. Tarqatyp aıtqanda, munaıǵa degen suranys pen usynystyń arasyndaǵy tepe-teńdikke syzat tústi, jetkizilim tapshylyǵy bolmaıdy. Al koronavırýstyq ınfeksııanyń taralýyna baılanysty energııaǵa degen suranys qazir qubylyp tur.
Sarapshylar Brent markaly munaı baǵasy 68,45 dollarǵa deıin, tipti odan da tómen arzandap ketýi múmkin ekenin aıtýda. Osy kúnge deıin sarapshylar aıtyp kelgendeı, Brent markaly barrel baǵasy 60 dollardan tómendep ketkende ǵana teńgege qaýip tónýi múmkin, oǵan deıingi ózgeristerdi et pen teri arasyndaǵy jel dep qabyldaýǵa bolady.
Kapıtal naryǵy qazir qaýipsiz aktıvterge qyzyǵýshylyq tanytyp otyr, sondyqtan dollar, japon ıenasy jáne altynnyń bási basym bolyp tur.
Jaqyn arada sheteldik valıýtalar kelesideı ózgeredi: AQSh dollary 427,50-428,00 teńge, eýro - 504-510 teńge, rýbl - 5,75-5,78 teńge aralyǵynda saýdalanady.